पोखरा । क्षत्री समाज नेपालले २६ औं क्षत्री दिवस अवसरमा पोखरामा आइतबार ‘शक्ति’ प्रदर्शन गरेको छ । जातीय पोशाकमा सजिएका क्षत्रीहरुले पोखरा बजारमा झाँकीसहित ¥याली प्रदर्शन गर्नुका साथै सभा आयोजना गरेको हो ।

नेपालको कुल जनसंख्याको सबैभन्दा धेरै ४७ लाख जनसंख्या क्षत्रीको छ । बडादसैंमा घटनास्थापनाको दिनलाई आफ्नो दिवसको रुपमा मनाउन थालेका क्षत्री समुदायले विभिन्न नाराअंकित प्लेकार्डसहित राष्ट्रिय अखण्डता, जातीय सद्भाव, सहअस्तित्व, समन्वय र सहिष्णुताको संस्कृति कायम गर्नुपर्नेमा जोड दिए ।

क्षत्री समाजको कार्यालयबाट निस्केको ¥याली महेन्द्रपुल, चिप्लेढुंगा, नयाँबजार, सभागृहचोक, पृथ्वीचोक हुँदै नयाँबजारस्थित प्रदर्शनी केन्द्र पुगेर सभामा परिणत भएको थियो । ¥यालीका सहभागीले भजनकीर्तन गर्नुका साथै विभिन्न नाचगान प्रदर्शन गर्दा धेरैबेरसम्म ट्राफिक जाम समेत भएको थियो ।

महिलाहरु ढाकाको चोलो र साडीमा सजिएका थिए भने पुरुषहरु दौरा सुरुवाल र कोटमा सजिएका थिए । क्षत्री समाजको प्रतिनिधित्व गर्ने विभिन्न क्षेत्रबाट क्षेत्रीहरु ठुलो संख्यामा उपस्थित थिए ।

गण्डकी प्रज्ञा प्रतिष्ठानका कुलपति सूर्य खड्का बिखर्चीको प्रमुख आतिथ्यमा भएको कार्यक्रमका वक्ताले सबै जातजातिको अस्तित्व कायम गर्ने वातावरण सिर्जना हुनुपर्नेमा जोड दिए ।

समाजको महिला समिति अध्यक्ष उर्मिला खड्काले त यो दिवस भनेको आफूहरुको शक्ति प्रदर्शन गर्ने दिन हो भनिन् ।

समाजका अध्यक्ष प्राडा दिलबहादुर क्षत्रीले आफूहरु नै आदिवासी रहेको दाबी गर्दै एकले अर्काको अस्तित्व स्वीकार गर्नुपर्नेमा जोड दिन्छन् ।

उनले आरक्षण भनेको कुनै जाति विशेषले पाउने नभई गरिबले पाउने हो भने । उनले वैदेशिक सनातन राष्ट्र नेपाललाई हिन्दू राष्ट्र कायम हुनुपर्नेमा जोड दिए ।

समारोहमा सरुन नाच प्रदर्शन गर्नुका साथै विभिन्न व्यक्तिलाई सम्मान एवं विद्यार्थीलाई छात्रवृत्ति वितरण गरिएको आयोजक क्षत्री समाज नेपाल कास्कीका अध्यक्ष बेनीबहादुर कार्कीले बताए ।

आसूरी शक्तिमाथि विजय प्राप्त गरेको दिनको सम्झनाको रुपमा क्षत्री समाजले २०५६ सालदेखि यो दिवस मनाउन थालेको हो ।

दिवस अवसरमा केन्द्रीय समितिको आह्वानमा देशैभर विविध कार्यक्रम गरिएको केन्द्रीय उपाध्यक्ष एवं प्रचार बिभाग प्रमुख कृष्णबहादुर थापाले बताए ।