चार वटा आन्तरिक विमानस्थलले निशेषाज्ञाको अवधिमा पनि उडान अनुमति पाएका छन् । हवाई सेवाको नियामक निकाय नागरिक उड्डयन प्राधिकरणले आपतकालिन उद्धार र खाद्यान्न ढुवानीको लागि चार विमानस्थलले उडान अनुमति दिने निर्णय गरेको हो ।
प्राधिकरणको यो निर्णयसँगै उडान अनुमतिका लागि अनुमति प्राप्त गरेका वायुयानले पोखरा विमानस्थल, नेपालगन्ज विमानस्थल, लुक्ला र सुर्खेत विमानस्थलबाट उडान अनुमति प्राप्त गर्न सक्ने प्राधिकरणका महानिर्देशक राजन पोखरेलले बताए ।
आइतबार बसेको मन्त्रिपरिषद् बैठकले भने आन्तरिकमा वैशाख २० गते सोमबार राति १२ बजेदेखि र अन्तर्राष्ट्रियतर्फ भारत बाहेकका देशबाट हुने उडानमा बिहीबार राति १२ बजेदेखि व्यावसायिक उडानमा रोक लगाउने निर्णय गरेको थियो ।

आन्तरिक र अन्तर्राष्ट्रिय चार्टर तथा उद्धार उडानको हकमा स्वास्थ्य सुरक्षा मापदण्डको पूर्ण पालना हुने गरी मन्त्रालयले उडान अनुमति जारी गर्ने निर्णय गरेको थियो । योसँगै प्राधिकरणले चार्टर, आपतकालिन उद्धार उडानका लागि चार विमानस्थलबाट उडान अनुमति प्रदान गर्ने निर्णय गरेको प्राधिकरणले जनाएको छ ।

यसैगरी हिमाल आरोही तथा पर्यटकको आपतकालीन उद्धार र खाद्यान्न ढुवानीको लागि हुने उडानलाई यस्तो अनुमति सम्बन्धित विमानस्थल कार्यालयले नै उडान अनुमति जारी गर्ने सक्ने अधिकार रहेको प्राधिकरणले जनाएको छ ।

उपत्यकाबाट हुने आन्तरिक तथा बाह्य उडानको लागि भने त्रिभुवन अन्तर्राष्ट्रिय विमानस्थलले उडान अनुमति जारी गर्ने छ ।
यता भारतसँग भने सातामा २ वटा हवाई उडान भर्ने गरी नेपाल–भारतबीच भएको एयर बबल मोडेलमा उडान हुनेछ ।

स्वास्थ्य मापदण्डको पूर्ण पालना गरी पर्यटन मन्त्रालयले सूचीकृत गरेको होटलमा १० दिन अनिवार्य क्वारेन्टाइनमा बस्ने गरी हप्ताको दुईवटा उडान गर्न पाउने प्रधानमन्त्री तथा मन्त्रिपरिषद्को कार्यालयले आइतबार जारी गरेको निर्णयमा भनिएको छ । आजको कारोबार दैनिकबाट