आर्थिक सञ्जाल २०७७ जेठ ४ गते आइतबार

(आर्थिक सञ्जाल प्रतिनिधी) गणेश थापा

क्यालिफोर्निया,  १७ मे २०२० । नोवल कोरोना भाइरसको संक्रमणका कारण संयुक्त राज्य अमेरिकामा मृत्यु हुनेको संख्या ९० हजार नजिक पुगेको छ ।

विश्वको सुपरपावर अमेरिकामा संक्रमितको संख्यामा समेत तीब्रगतिमा बृद्धि भइरहेको छ । अफिसियल डाटा अपडेट गर्दैआएको न्युजब्रेकका अनुसार गत जनवरीमा कोभिड-१९ को संक्रमण देखिएयता अमेरिकामा अहिलेसम्म १५ लाखभन्दा बढी मानिस संक्रमित भएका छन् ।

यस अवधिमा कोरोना भाइरसको संक्रमणबाट ८९ हजार ४८६ जना अमेरिकाबासीहरूको ज्यान गएको छ । यो तथ्यांक क्यालिफोर्नियाको स्थानीय समय अनुसार शनिबार राति ३ बजे (नेपाली समय आइतबार अपरान्ह ४ बजे) सम्मको प्राप्त अपडेट हो ।

हालसम्म कोरोना भाइरसको संक्रमणबाट करीव ४७ लाख २० हजार मानिस संक्रमित भइसकेको विश्वभरको कूल संख्याको झण्डै ३३ प्रतिशत मानिस अमेरिकामा मात्रै संक्रमित भएका छन् ।

हिजो मात्रै १३ सय बढीको मृत्यु भएकोमा आज २४ घण्टाको अवधिमा करीव सॉढे १२ सयको हाराहारीमा मानिसहरूले ज्यान गुमाएका छन् । संसारभर अहिलेसम्म करीव ३ लाख १५ हजारको मृत्यु भइसकेको छ । यो समाचार तयार पार्दाताकासम्म सान फ्रान्सिस्को क्रोनिकल मिडियाका अनुसार न्यूयोर्कमा सवैभन्दा बढी मानिसको मृत्यु भएको छ ।

त्यहॉ मृत्यु हुनेको संख्या २८ हजारको हाराहारीमा पुगेको छ । यसैगरी संक्रमितको संख्यामा समेत बृद्घि भएर सॉढे ३ लाख माथि पुगेको छ । यता क्यालिफोर्नियामा पनि मृतको संख्या ३२०८ नाघेको छ भने झण्डै ७९ हजार मानिसमा संक्रमण देखिएको छ ।

कोरोना संक्रमणका कारण दिनहुँ २ हजार बढीको मृत्यु भइरहेको अमेरिकामा केही दिनयताबाट मृतक तथा संक्रमितको संख्यामा कमी आएको छ । आज २४ घण्टाको अवधिमा करीव २४ हजार ५ सय नयॉ विरामीहरू थपिएका छन् ।

स्वास्थ्य क्षेत्रका विशेषज्ञहरूले अमेरिकामा कोभिड-१९ को संक्रमणबाट २ लाख बढीको मृत्यु एवम् दसौं लाख मानिसमा संक्रमण फैलिन सक्ने चेतावनी दिदै आएका छन् ।

कोरोना भाइरसको संक्रमण फैलिएयता यहॉ करीव २ लाख ६४ हजार विरामी उपचार पश्चात घर फर्किसकेका छन् । कोरोना भाइरसको संक्रमणबाट अमेरिकामा हालसम्म १५ जना नेपालीहरूको मृत्यु भएको छ भने संक्रमित हुने नेपालीको संख्या सयौं छ ।

अमेरिकाका ५० वटै राज्यमा फैलिएको कोरोनाबाट करीव २ करोड जनसंख्या रहेको न्युयोर्कमा मृतक तथा संक्रमित संख्या अन्यत्रभन्दा बढी छ । सो ठॉउमा नेपालीहरूको समेत बाक्लो बसोबास रहेको हुँदा त्यहॉ सवैभन्दा बढी नेपाली प्रभावित भएको बताइएको छ । अमेरिकामा कोरोना भाइरसबाट संक्रमित नेपालीको संख्या १५ सयभन्दा बढी रहेको सामाजिक संघसंस्थाहरूले जनाएका छन् । नेपालीमूलका अमेरिकाको मेरिल्याण्डका राज्यसभा सदस्य ह्यारी भण्डारी कोरोना संक्रमितको सहयोग तथा मृतकहरूको शव व्यवस्थापनमा सक्रिय भूमिका खेल्दैआएका छन् ।

यसैबीच कोरोना भाइरसबाट प्रभावित सर्वसाधारण नागरिक, मजदुर, व्यापार व्यावसाय, स्वास्थ्य तथा आर्थिक क्षेत्र लगायत राज्य र स्थानीय सरकारलाई समेत समेट्नेगरि ल्याइएको करीव ३ ट्रिलियन डलर बराबरको विशाल आर्थिक राहत प्याकेज सम्बन्धी विधेयक शुक्रबार अमेरिकी संसदको तल्लो सदन (हाउस) बाट पारित भएको छ ।

डेमोक्रेटिक सांसदहरूको योजनामा ल्याइएको उक्त विधेयकको विपक्षमा रहेको सत्तारूढ रिपब्लिकन पार्टीको सहमतिविना माथिल्लो सदन (सिनेट) बाट पास हुने संभावना न्युन छ । सिनेटमा रिपब्लिकनको बहुमत छ । विधेयकमा प्रतिव्यक्ति पुन: १२ सय डलर तथा ५ जनासम्मको परिवारलाई ६ हजार डलर वितरण गर्नेदेखि मजदुर, विद्यार्थि लगायत विपन्न वर्गलाई समेटिएको छ ।

महामारीको रूपमा फैलिएको कोरोना संक्रमणपछि उत्पन्न परिस्थितिसंग लडिरहेको विश्वको सर्वशक्तिमान राष्ट्र अमेरिकामा अदृश्य यस भाइरसको नियन्त्रणमा लामो समय लाग्नसक्ने विज्ञहरूले बताएका छन् ।

अहिलेसम्म अमेरिकामा इतिहासमै सर्वाधिक ३ करोड ६० भन्दा बढी मानिसले वेरोजगार भत्ताका लागि फारम भरेका छन् । आफू वेरोजगार भएको पुष्टि गरेमा प्रति हप्ता झण्डै ८ सय डलरसम्म भत्ता प्राप्त गर्नेछन् ।

यता राष्ट्रपति डोनाल्ड ट्रम्प भने यसै वर्षको अन्त्यसम्ममा कोरोनाविरूद्धको भ्याक्सिन आइसक्ने, आगामी दिनमा भाइरसको संक्रमण कमहुदै जाने, प्रभावित अमेरिकी व्यापार व्यवसाय, जनजिवन र खस्किरहेको अर्थतन्त्रलाई चाडै नै पुरानै अवस्थामा फर्काउने आफ्नो आत्मविश्वासलाई देशबासीमाझ बाँडिरहेका छन । यसबीचमा राष्ट्रपति ट्रम्पले कोरोना भाइरसबाट प्रभावित विभिन्न राज्यहरूको भ्रमण गर्नुका साथै स्वास्थ्य सामग्री तथा आवश्यक सहयोग उपलब्ध गराउनेतर्फ केन्द्रित रहेका छन् ।

यो उनको चुनावी रणनीति पनि हुनसक्ने विश्लेषकहरू बताउछन् । अमेरिकामा आउँदो नोभेम्वरमा नयाँ राष्ट्रपति चयनका लागि निर्वाचन हुदैछ ।