आर्थिक सञ्जाल २०७७ वैशाख २९ गते सोमबार

काठमाडौं । नेपालमा सोमबार बेलुका थप १३ जनामा कोरोना संक्रमण भेटिएका छन । सोमबार कपिलवस्तुमा ६, रुपन्देहीमा ६ र बर्दियामा १ जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।

विहान र दिउँसो गरी ११ जनामा संक्रमण फेला परेको अवस्थामा साँझ पुनः १३ जनामा संक्रमण फेला परेसँगै नेपालमा काेराेना संक्रमितकाे संख्या १३४ पुगेकाे छ ।

कपिलवस्तुको यशोधरा गाउँपालिका – ८ र वुद्धभूमि नगरपालिका- ७ का १५, १९, २३, ३०, ३२ र ३८ वर्षका पुरुषमा कोरोना संक्रमण देखिएको स्वास्थ्य मन्त्रालयका प्रवक्ता डा. विकास देवकोटाले जानकारी दिए ।

उनीहरुको राष्ट्रिय जनस्वास्थ्य प्रयोगशालामा गरिएको परीक्षणमा कोरोना संक्रमण पुष्टि भएको मन्त्रालयका प्रवक्ता डा देवकोटाले जानकारी दिए ।

त्यस्तै रुपन्देहीको सम्मरीमाई गाउँपालिका‍ ७ र लुम्बिनी साँस्कृतिक गाउँपालिका ६ का  २४, २६, २७, ३०, ३२ र ४० वर्षका पुरुषमा कोरोना संक्रमण देखिएको उनले बताए ।

साेमबार बिहानै स्वास्थ्य तथा जनसंख्या मन्त्रालयका सह-प्रवक्ता डाक्टर समीरकुमार अधिकारीले कपिलवस्तुको यशोधरा गाउँपालिकाका १८ वर्ष देखि ३४ वर्षका पुरुषमा कोरोना संक्रमण पुष्टि भएको जानकारी दिएका थिए भने दिउसाे कपिलबस्तुकै १ जनामा काेराेना संक्रमण देखिएकाे थियाे ।

परीक्षणलाई तीव्रता
स्वास्थ्य तथा जनसङ्ख्या मन्त्रालयले कोरोना भाइरसको सम्भावित जोखिमबाट बचाउनका लागि परीक्षणलाई तीव्रता दिएको छ ।

कोरोना भाइरस रोकथाम गर्नका लागि पीसीआर परीक्षण १७ हजार ८०९ र आरडीटी ५८ हजार ५४६ व्यक्तिमा गर्न सफल भएको स्वास्थ्य तथा जनसङ्ख्या  मन्त्रालयले जनाएकाे छ ।

पछिल्लो २४ घण्टामा थप दुई हजार ७९९ को परीक्षण सम्पन्न गरेको छ । मन्त्रालयमा आज आयोजित नियमति पत्रकार सम्मेलनमा मन्त्रालयका प्रवक्ता डा विकास देवकोटाकाले कोरोना भाइरसको रोकथाम गर्नका लागि परीक्षणलाई तीव्रता दिएको जानकारी दिए ।

आजसम्म आरडीटी परीक्षण प्रदेश नम्बर १ मा सात हजार ७३७, प्रदेश नं. २ मा पाँच हजार ९२७, वाग्मती प्रदेशमा नौ हजार २९०, गण्डकी प्रदेशमा छ हजार ४८५, प्रदेश नं. ५ मा छ हजार ९८५, कर्णाली प्रदेशमा सात हजार ११४ र सुदूरपश्चिम प्रदेशमा १५ हजार नौवटा परीक्षण भएको छ । हाल १२ हजार ७०१ क्वारेन्टाइनमा रहेका छन् । आइसोलेशनमा १५३ रहेका छन् ।

कोरोना भाइरस सङ्क्रमित १२१ जना पुगेका छन् । तीमध्ये ३३ जना ठीक घर फर्किएका छन् । हालसम्म रेडजोनमा ३४२ रहेका छन् ।

यसैबीच, चीन सरकारले प्रतिबद्धता गरेको स्वास्थ्य सामग्रीमध्ये केही स्वास्थ्य सामग्री आज स्वास्थ्य तथा जनसङ्ख्या मन्त्री भानुभक्त ढकाललाई हस्तान्तरण गरिएको छ ।

ती स्वास्थ्य सामग्रीमध्ये ४० हजार थान पसीआर टेष्ट किट, १० हजार डिपोजएल गाउन, एन ९५ मास्क २० हजार र सर्जिकल मास्क आठ हजार र मेडिकल चस्मा १० हजार मन्त्रालयलाई हस्तान्तरण भएको छ ।