आर्थिक सञ्जाल २०७७ वैशाख १६ गते मंगलबार 

डोटी । काठमाडौँबाट सोमबार गृह जिल्ला आएका डोटीका ७३ जनालाई २१ दिन क्वारेन्टिनमा राखिने भएको छ । बन्दाबन्दी (लकडाउन) का कारण काठमाडौँमै अलपत्र परेकाहरूलाई स्थानीय तहहरूले पहल गरी घर फर्काएका हुन् ।

काठमाडौँ जिल्ला प्रशासन कार्यालयको सवारी पास लिएर आइतबार प्रस्थान गरेका बा ५ ख २८६१ र बा ५ख २८७३ नम्बरका दुई बसबाट उनीहरू सोमबार डोटी पुगेका जिल्ला प्रहरी कार्यालय डोटीका सूचना अधिकारी प्रहरी निरीक्षक कर्ण बोहराले जानकारी दिए ।

सम्बन्धित स्थानीय तहहरूले नै व्यवस्थापन गर्ने गरी उनीहरूलाई क्वारेन्टिनमा राखिने डोटीका प्रमुख जिल्ला अधिकारी टेकनारायण पौडेलले बताए ।

सुदूरपश्चिम प्रदेश सरकार र जिल्ला प्रशासन कार्यालय डोटीलाई कुनै जानकारी नदिई ती व्यक्तिहरू एक्कासि डोटीको बुडर पुगेपछि आफूलाई खबर आएको प्रजिअ पौडेलले बताए ।

डोटी भित्रिएकाहरूमा पूर्वी चौकी गाउँपालिकाका ३४, बोगटान फुड्सिल गाउँपालिकाका १९, केआईसिंह गाउँपालिकाका ९, आदर्श गाउँपालिकाका ७ तथा शिखर नगरपालिका र दिपायल सिलगढी नगरपालिकाका २र२ जना रहेको प्रहरीले जनाएको छ ।

लकडाउनका बेला काठमाडौँबाट डोटी ल्याइएकोमा स्थानीयहरूले मिश्रित प्रतिक्रिया दिएका छन् ।स्थानीय तहहरूले राम्रो काम गरेको कतिपयको बुझाइ रहेको छ ।

कतिपयले यसरी बाहिरबाट मान्छेहरू ओसार्दा कोरोना सङ्क्रमणको जोखिम बढ्ने भन्दै यसो नगर्नसमेत आग्रह गर्छन् ।