आर्थिक सञ्जाल वैशाख ९, २०७७ मंगलबार

काठमाडौं ।  कोभिड – १९ को महामारी नियन्त्रणमा नआउँदा सम्मका लागि शंकरापुर अस्पताललाई कोरोना उपचार नगर विशेष अस्पतालको रुपमा परिणत गरिएको गोकर्णेश्वर नगरपालिका नगर प्रमुख सन्तोष चालिसेले जानकारी दिएका छन् ।

चालिसेले गोकर्णेश्वर नगरपालिका र शंकरापुर अस्पताल प्रशासन बीच भएको सम्झौँता अनुसार नगर अस्पतालमा परिणत गरिएको बताएका छन् । सम्झौँता पछि शंकरापुर अस्पतालको नाम गोकर्णेश्वर शंकरापुर विशेष नगर अस्पताल कायम गरिएको छ ।

कोभिड भाइरसको फैलावट रोकथामका लागि स्थानीय समुदायलाई स्वास्थ्य उपचार सेवा प्रवाह गर्न विशेष क्वारेन्टाइन, आइसोलेसन वार्ड, फिवर क्लिनिक लगायतका थप सेवा सञ्चालन गर्न नगरपालिकासंग सम्झौता गरिएको छ । साथै चालिसेले यो सम्झौँता भाइरसको जोखिम रहुन्जेलसम्म लाई रहने पनि बताएका छन् ।

सम्झौँतामा नगरपालिकाका तर्फबाट नगरप्रमुख सन्तोष चालिसे र अस्पतालको तर्फबाट प्रमुख कार्यकारी अधिकृत रामहरि सापकोटाले हस्ताक्षर गरेको गोकर्णेश्वर नगरपालिकाका प्रमुख प्रशासकीय अधिकृत अग्नि प्रसाद अधिकारीले जानकारी दिएका छन् ।

सम्झौँता अनुसार अब अस्पतालले १० वेडको हस्पिटल, क्वारेन्टिन, १० वेडको आइसोलेसन वार्ड, ५ बेडको आइसीयू सहितको २ वटा भेन्टिलेटर र सञ्चालनमा रहेको एम्वुलेन्स कोभिड महामारी व्यवस्थापनमा प्रयोग गर्न नगरपालिकालाई दिने उल्लेख गरिएको छ ।

सम्झौता पछि अस्पताल सञ्चालन गर्न नगर प्रमुख सन्तोष चालिसेको संयोजकत्वमा ११ सदस्यीय नयाँ कार्यसमिति बनाइएको छ । उक्त समितिमा नगरपालिकाका प्रमुख प्रशासकीय अधिकृत अग्नी प्रसाद अधिकारी, गोकर्ण प्राथमिक अस्पताल प्रमुख डा सृजना पाण्डेय, हेल्थ कन्सर्न डा सुवास प्याकुरेल, रामहरि सापकोटा सदस्य रहेका छन् ।

यस्तै डा कुशल थापा, डा रमेश ढकाल, डा सतिश कुमार देव र डा पवनराज चालिसे सदस्य रहेका छन् ।                 डा सुवास प्रसाद आचार्य आमन्त्रित सदस्य रहेका छन । नयाँ व्यवस्थापन अनुसार अस्पतालले कोभिड र नन कोभिड विरामीलाई सहज रुपमा सेवा उपलव्ध गराउँनेछ