काठमाडौँ । नेपाल राष्ट्र बैंकका पूर्व गभर्नर डा. चिरञ्जीवी नेपालले नेपाल राष्ट्र बैंकले सार्वजनिक गरेको मौद्रिक नीतिले व्यापारी–व्यवसायीहरुलाई राहत देला जस्तो आफुलाई नलागेको बताएका छन ।

राष्ट्रिय व्यापार संघले आयोजना गरेको ‘कर नीति, मौद्रिक नीति’ तथा वर्तमान आर्थिक अवस्थाको विषयमा छलफल कार्यक्रममा प्रमुख अतिथी बनेका पूर्व गभर्नर डा. नेपालले भने–‘ मौद्रिक नीतिले सरकारले लिएको आर्थिक वृद्धिको नीतिलाई टेवा पु¥याउँदैन ।

राजनीतिक दलका नेताहरुले आफ्नो स्वार्थका लागि मुलुकलाई दुरगामी असर पर्ने कुरा विचार नगरि बोलिदिंदा आर्थिक अवस्थालाई कहिले काहीं गम्भीर असर पु¥याउने बताउँदै पूर्व गभर्नर डा. नेपालले नीति–निर्माण गर्नेहरुले आफ्नो स्वार्थ हेर्न नहुने सुझाव दिए ।

कोभिड पछिको जनजीवन अहिले सामान्य जस्तो देखिए पनि आर्थिक अवस्था अप्थ्यारै रहेको भन्दै पूर्व गभर्नर डा. नेपालले व्यापारी–व्यवसायीलाई सहज वातावरण बनाई दिन सरोकारवालाहरुसंग आग्रह पनि गरे ।

पर्यटन र अनुदान लगायतका कारणबाट राज्यको ढुकुटी बढ्दै जाने र आर्थिक अवस्थामा सुधार आउने अपेक्षा डा.नेपालले गरेका छन ।

राष्ट्रिय व्यापार संघका अध्यक्ष सरोज कुमार श्रेष्ठले व्यापारी–व्यवसायीका समस्या प्रति गम्भीर भइदिन राज्य पक्षलाई आग्रह गरेको उक्त छलफल कार्यक्रममा उपाध्यक्ष रामचन्द्र पराजुलीले बैंकहरुले नाकामा गरेको कडाइका कारण व्यापारी–व्यवसायीकाहरुलाई समस्या परेको सुनाए ।

करदाता सेवा कार्यालय न्यूरोडका प्रमुख बिनोद लामिछानले नीतिहरुमा पुनरावलोकन हुनुपर्ने बताउँदै राजश्वको मूल आधार आन्तरिक स्रोत भएको चर्चा गरे

कार्यक्रम सञ्चालन गर्दै राष्ट्रिय व्यापार संघका महासचिव बैकुण्ठ दाहालले जन्मेदेखि मृत्युसम्म कर तिर्नेहरुका लागि सहज वातावरण बनाउन राज्यका नीति–नियमहरु उद्दत हुनुपर्ने उल्लेख गरे ।