काठमाडौं। काठमाडौंको चावहिलस्थित एक गोदाम घरमा नेपाल प्रहरीको बिशेष टोलीले छापा मारि पटका लगायतका विस्फोटक पदार्थ बरामद गरेको छ ।

उपत्यका अपराध अनुसन्धान कार्यालयको बिशेष टोलीले आज साउन ५ गते दिउँसो उक्त गोदाममा छापा मार्दा पटका अर्थात बिस्फोटक पदार्थ सहित भन्सार छलीका बिभिन्न सामग्रीहरु बरामद गरेको छ ।

त्यहाँ अवैध कारोबार हुने गरेको सूचनाका आधारमा प्रहरीको विशेष टोली पुगेको थियो। गोदामबाट पटकासहित विभिन्न बिदेशी ब्रान्डका चुरोट, गुट्खा, हुक्का फ्लेबर्स र अक्सिमिटर बरामद गरेको छ ।

बरामद गरिएका बस्तु करिब १ करोड मुल्य बराबरका रहेको अपराध अनुसन्धान कार्यालयका एसपी कृष्ण कोइरालाले जानकारी दिएका छन् ।

एसपी कोइरालाले भन्सार छलेर ल्याइएको सामान र गोदामका मालिक पर्सा जिल्लाको सुखवा प्रसौनी गाउँपालिका १ घरभई काठमाडौं कपन डेरा गरि बस्ने ४० वर्षीय छविलाल अगस्तीलाई पक्राउ गरिएको छ ।

भन्सार छलीका सामानमा पटका समेत रहेकोले निज छबिलालमाथि विस्फोटक पदार्थ ऐनसम्बन्धी कसुरमा मुद्दा चलाइने एसपी कोइरालाले बताएका छन । बरामद भएका सामानहरु राजश्व अनुसन्धान विभाग हरिहरमा पठाइएको प्रहरीले जानकारी दिएको छ ।