काठमाडौँ । नेपाल पेट्रोलियम डिलर्स राष्ट्रिय एसोसिएसनले देशभरका पेट्रोलियम विक्रेताहरुलाई उधारो कारोबार बन्द गर्न निर्देशन दिएको छ ।

विभिन्न व्यक्ति, फर्म, कम्पनी तथा कार्यालयहरुले उधारोमा पेट्रोलियम पदार्थको कारोबार गर्ने गरेको र सो रकम सम्बन्धित पेट्रोल पम्पलाई चुक्ता नगरी पुनः अर्को पेट्रोल पम्पबाट सोही खरिदकर्ताहरुले पुनः उधारो लिने गरेको पाइएकाले एसोसिएसनले उधारो कारोबार बन्द गर्न निर्देशन दिएको हो ।

एसोसिएसनको १२ गते बसेको केन्द्रीय कार्यसमितिको बैठकले पेट्रोलियम पदार्थको खरिद अग्रिम रुपमा नगद भुक्तानी गरेर मात्र हुने हुँदा बिक्री वितरण पनि नगदमा मात्र गर्न गराउने निर्णय गरेको थियो ।

सोही अनुसार यस अघि उधारोमा कारोबार गरिरहेका खरिदकर्ताहरुसहित कसैलाई पनि साउनबाट उधारोमा कारोबार नगर्नरनगराउन निर्देशन जारी गरिएको एसोसिएसनले जनाएको छ । हुन जानकारी गराउँदै यो सूचना सार्वजनिक गर्ने निर्णय गरेको छ।

साथै यस अघि एउटा पेट्रोल पम्पसँग लिइएको उधारो भुक्तानी नगरी अर्को पेट्रोल पम्पबाट पुनः उधारोमा कारोबार गर्ने वा लामो समयदेखि उधारो रकम भुक्तानी समेत नगर्ने खरिद कर्ता व्यक्ति फर्म, कम्पनी तथा कार्यालयहरुको विवरण महिना भित्र एसोसिएसनमा उपलब्ध गराउन सदस्य विक्रेताहरूलाई आग्रह गरेको छ ।

त्यस्ता खरिदकर्ताहरुलाई पुरानो पेट्रोल पम्पको बाँकी बक्यौता चुक्ता नगरेसम्म कालोसूचीमा राखी नाम सार्वजनिक गर्ने र कुनै पनि पेट्रोल पम्पहरुबाट नगदमा समेत पेट्रोलियम पदार्थ उपलब्ध नगराउने चेतावनी दिएको छ ।