काठमाडौं । निजी क्षेत्रको अग्रणी वायुसेवा प्रदायक कम्पनी श्री एयरलाइन्सले जहाज थपेर सेवा र बजार विस्तार गर्ने रणनीति लिएको जनाएको छ । गन्तव्य विस्तार गरी सेवालाई प्रभावकारी बनाउन श्री एयरलाइन्सले नयाँ जहाज थप्नेदेखि गन्तव्य बजार प्रवर्द्वनको काम अघि बढाएको छ ।

कम्पनीले अघिल्लो एकै महिनामा थप दुई वटा नयाँ जहाज खरिद गरेको थियो । कम्पनीले पछिल्लो पटक ८० सिट क्षमताको क्यू ४००–८ जहाज थपेको छ । योसँगै कम्पनीको उडान सेवामा आठ वटा जहाज भएका छन् ।

श्री एयरलाइन्सका प्रवन्धक अनिल मानन्धरले जानकारी दिए अनुसार श्री एयरलाइन्सले ५ वटा जहाज भित्रयाउने योजना अन्तगर्त ८० सिट क्षमताका समान तीन जहाज मध्ये दुई वटा आइसकेको र बाँकी एउटा जहाज छिट्टै भित्रयाउने कम्पनीको योजना रहेको छ ।

ततपश्चात अन्य दुई जहाजको पनि खरिद प्रक्रिया अघि बढाइने छ । कम्पनीले जहाज थप्ने र बजार विस्तार गर्ने योजना अनुरुप पाँच वटा जहाज खरिदका लागि संस्कृति, पर्यटन तथा नागरिक उड्डयन मन्त्रालयमा निवेदन दिएको थियो। अनुमति मागेको मध्ये तीन वटा जहाज खरिद भइसकेको छ, दुई थान आइसकेको छ, बाँकी एक जहाज पनि छिट्टै नेपाल ल्याउदैछ ।

हाल उडान भइरहेका गन्तव्यमा उडान थप्ने, सुर्खेत र तुम्लिङटारमा नयाँ उडान सञ्चालन गर्ने कम्पनीको योजना रहेको प्रबन्धक मानन्धरले बताए । यसका लागि एयरलाइन्सले नियामक नेपाल नागरिक उड्डयन प्राधिकरणसँग उडान अनुमति मागिसकेको छ ।

परिस्थिति अनुकूल भएपछि उडान विस्तार गरिने कम्पनीले बताएको छ । शुरुमा हाल एक मात्रै उडान गरिरहेका गन्तव्यहरु सिमरा र जनकपुरमा उडान थपिने भएको छ । त्यसपछि नेपाजगञ्ज, धनगढी, भद्रपुर लगायत गन्तव्यमा उडान थपिने एयरलाइन्सले जनाएको छ ।

श्री एयरलाइन्सले यसअघि आन्तरिक उडानमा ड्यास क्यू ४०० जहाज दुई वटा तथा सीआजे २०० (५० सिटे) दुई थान र सीआरजे ७०० (७० सिटे) दुई थान जहाज मार्फत उडान सेवा सञ्चालन गर्दै आएको जनाएको छ ।