काठमाडौँ । मीनभवनस्थित सिभिल अस्पताललाई वाग्मती प्रदेश सभा सदस्य दीपेन्द्र श्रेष्ठको पहलमा रु एक करोड १८ लाख बराबरको स्वास्थ्य सामग्री हस्तान्तरण गरिएको छ ।

च्वाइस ह्युमानिटेरियन सामाजिक संस्थाको सहयोगमा भेन्टिलेटर, अक्सिजन सिलिण्डर, पिपीइ, पञ्जा, अक्सिमिटर, फेस सिल्ड, इमरजेन्सी ट्रेलर लगायत रु एक करोड १८ लाख बराबरको स्वास्थ्य सामग्री हस्तान्तरण गरिएको हो ।

अक्सिजन प्लान्ट स्थापना गर्न मद्दत मिल्ने गरी वाग्मती सरकारले दिएको रु दुई करोडमा रु एक करोड अपुग भएकाले रु एक करोड १८ लाख बराबरको सामग्री सहयोग जुटाएर हस्तान्तरण गरिएको वाग्मती प्रदेशसभा सदस्य श्रेष्ठले जानकारी दिनुभयो ।

अस्पतालका कार्यकारी निर्देशक विधाननिधि पौडेलले प्रदेशसभा सदस्य श्रेष्ठले यसअघि अस्पतालमै आएर आवश्यक सामग्रीको सूची लिएर उपलब्ध गराउनुभएको बताउनुभयो । नयाँ भेरियन्टसहितको दोस्रो चरणको कोरोना फैलिएपछि खरिद प्रक्रिया पनि पूरा गर्न नपाएकाले स्वास्थ्य सामग्रीको अभाव भएका बेला सामग्री पाउँदा स्वास्थ्य सेवा दिन सहज भएको उहाँको भनाइ थियो । कोरोनाको तेस्रो चरणको लहर पनि आउने अनुमान भइरहेकाले अहिलेदेखि तयारी शुरु गरिएको अस्पतालले जनाएको छ ।

सहयोगी संस्थाका कार्यकारी निर्देशक प्रतीक शर्माले बानेश्वर क्षेत्रमा स्वास्थ्य सेवा उपलब्ध गराएको सिभिल अस्पताललाई आवश्यकताका आधारमा सामग्री उपलब्ध गराइएको बताउनुभयो । दाताबाट बुधबार नै संस्थाको कोषमा सहयोग आएकै दिन अस्पतालमा स्वास्थ्य सामग्री उपलब्ध गराउन सफल भएको उहाँले जानकारी दिनुभयो । निषेधाज्ञाका बीच १५ दिन विभिन्न स्थानमा गई खोजेर स्वास्थ्य सामग्री खरिद गरी उपलब्ध गराइएको हो ।

सुशील कोइराला मेमोरियल आइसोलेसन सेन्टर

यसैबीच काठमाडौँ महानगरपालिका–१० स्थित बुद्धनगरमा प्रस्तावित सुशील कोइराला मेमोरियल अस्पतालमा आइसोलेशन सेन्टर स्थापना गरिएको छ । प्रदेशसभा सदस्य श्रेष्ठको सक्रियतामा आइसोलेशन सेन्टर स्थापना गरिएको हो ।

सेन्टरमा महानगरपालिकाको वडा नं. १०, ११ र २९ का कोरोना सङ्क्रमितलाई राखिने छ । यस क्षेत्रमा कोरोना सङ्क्रमित भई घरमै आइसोलेशनमा बस्नेलाई पनि अस्पतालका तर्फबाट नर्सिङलगायत चिकित्सकीय स्वास्थ्य सेवा उपलब्ध गराइने अस्पतालका कार्यकारी निर्देशक डा रूपनारायण शाहले बताउनुभयो ।

आइसोलेशन सेन्टरलाई व्यवस्थित बनाउन वडा नं १० का अध्यक्ष रामकुमार केसी, वडा नं. ११ का अध्यक्ष हीरालाल तण्डुकार लगायत वडा सदस्य, समाजसेवी एवं बुद्धिजीवीले पनि सहयोग गर्ने गरी सहयोग समितिसमेत बनाइएको छ । रासस