कठमाडौं । उद्योग, वाणिज्य तथा आपूर्तिमन्त्री लेखराज भट्टले राष्ट्रिय सुरक्षासँग जोडिएको क्षेत्रमा इन्धन आपूर्ति गर्ने जिम्मा नेपाल आयल निगमले सरकारको छविलाई उच्च राख्नुपर्ने बताउनुभएको छ । निगमको ५१औँ साधारणसभामा पछिल्लो समय निगमले विभिन्न प्रविधि भित्र्याउन सफल भएको भन्दै उहाँले पेट्रोलियम पदार्थको गुणस्तर र शुद्धतामा ध्यान दिन आग्रह गर्नुभयो ।

नेपाल आयल निगमका कार्यकारी निर्देशक सुरेन्द्रकुमार पौडेलले अबको दुई वर्षभित्रमा पाइपलाइनबाट पेट्रोल ढुवानी हुने बताउनुभयो । उहाँले पेट्रोलियम पाइपलाइनमार्फत हाल डिजेलमात्र आयात भइरहेकामा पेट्रोलसमेत ल्याउने तयारी भएको जानकारी दिनुभयो ।

कार्यकारी निर्देशक  पौडेलले मोतिहारी–अमलेखगञ्ज पेट्रोलियम पाइपलाइन क्षमताको विस्तार गरेर डिजेलको सम्पूर्ण आयात सम्भव भएसम्म पाइपलाइन मार्फत मात्रै गर्ने व्यवस्था गर्न लागिएको बताउनुभयो । खाना पकाउने एलपी ग्यासको ढुवानीका लागि इन्डियन आयल कर्पोरेशनको वितरण केन्द्रलाई नेपाली सीमा नजिकको ‘लोकेशन’बाट आयातको व्यवस्था मिलाउन आवश्यक कार्यको थालनी गरेको उहाँले जानकारी दिनुभयो ।

उहाँले पूर्वाधारमा तीव्ररूपमा भएको विकासले पेट्रोलियम पदार्थको माग प्रत्येक वर्ष दुई अङ्कको दरले वृद्धि हुँदा माग र आपूर्तिबीच तालमेल कायम गर्न सञ्चयका लागि भण्डारणहरुको विस्तार तथा अन्य भौतिक पूर्वाधारको निर्माण गरिएको बताउनुभयो । कार्यकारी निर्देशक पौडेलले निगमको वार्षिक नीति तथा कार्यक्रम स्वरुप चालु आर्थिक वर्षमा गण्डकी प्रादेशिक कार्यालय पोखरा र २ नं प्रादेशिक कर्यालय अमलेखगञ्जमा भण्डारणगृहको निर्माण र विस्तारको काम शुरु भएको बताउनुभएको छ ।

यसैगरी झापा र धनुषामा ग्यास बोटलिङ प्लान्ट र भण्डारण निर्माण, अमलेखगञ्ज–चितवन लोथर पेट्रोलियम पाइपलाइन विस्तार, सिलगुढी–झापा पाइपलाइन निर्माण, झापाको चारआलीमा भण्डारणगृह निर्माण तथा नेपालगञ्ज र धनगढीमा भण्डारण क्षमता अभिवृद्धिका लागि जग्गा प्राप्ति गरेर पूर्वाधार विकासको काम भएको उहाँले जानकारी दिनुभयो ।

उहाँले मेकानिकल लकिङबाट डिजिटल लकिङ, टैंक–ट्रकहरुको नियमित अनुगमन, डिलरहरुको डिजिटल नक्साङ्कन गर्ने कार्यको शुरुआत गरिएको उल्लेख गर्दै निगमको सबै कार्यलाई व्यवस्थित बनाउन उद्यम संसाधन योजना सफ्टवेयरअनुसार तयार गर्ने, निगमको केन्द्रीय प्रयोगशाला लगायत अन्य प्रयोगशालाहरुलाई आइएसओ, एलइसी १७०२५ मान्यता गराई अन्तर्राष्ट्रियस्तर बमोजिम कायम गर्ने गरी आवश्यक कार्यको प्रारम्भ गरिएको बताउनुभयो ।

निगम सञ्चालक समितिका अध्यक्ष एवं वाणिज्य तथा आपूर्ति सचिव वैकुण्ठ अर्यालले पछिल्लो समय निगमले पूर्वाधार निर्माणमा फड्को मारेको बताउनुभयो । वि.सं २०२७ मा स्थापना भई पेट्रोलियम पदार्थको ढुवानीको एकलौटी अधिकार पाएको निगम पछिल्लो समय नाफामा गएको छ ।

गत आर्थिक वर्ष २०७६/०७७ मा निगमले रु १२ अर्ब ८७ करोड नाफा कमाएको थियो । लामो समयदेखि घाटामा रहेको निगम पछिल्लो समय नाफामा गएको हो । निगमले गत आव २०७२/०७३ मा रु १९ अर्ब ३६ करोड, आव २०७३/०७४ मा रु नौ अर्ब ४५ करोड, २०७४/०७५ मा रु तीन अर्ब ५८ करोड, २०७५/०७६ मा आठ अर्ब ७५ करोड र गत आ.व २०७६/०७७ मा रु १२ अर्ब ८७ करोड नाफा कमाएको जनाइएको छ ।

गत वर्षको भदौ (२०७६ साल भदौ २४ गते) देखि सञ्चालनमा ल्याइएको मोतिहारी–अमलेखगञ्ज पेट्रोलियम पाइपलाइन मार्फत १० महिनाको अवधिमा निगमले ढुवानीमार्फत रु एक अर्ब ४७ करोड बचत गरेको छ ।