काठमाडौं, फागुन १ गते

चीनमा कोरोना भाइरस प्रभावित हुबेई प्रान्तमा रहेका नेपालीहरुको उद्धारका लागि नेपाल वायुसेवा निगमको विमान शनिबार दिउँसो चीन तर्फ जाने भएको छ ।
विमानमा चालक दलका सदस्य र चार स्वास्थ्यकर्मी सहित १९ जना रहने छन् ।
हुबेई प्रान्तको वुहानबाट नेपालीहरुलाई लिएर सो वाइडबडी विमान आइतबार बिहान २ बजे काठमाडौं विमानस्थल अवतरण हुने निगमकी प्रवक्ता अर्चना खड्काले बताइन् ।
हुवेईमा रहेका १ सय ८७ जना नेपालीहरुले उद्धारका लागि आग्रह गरेका छन् । जसमध्ये धेरैजसो विद्यार्थी छन् । बेइजिङस्थित दूतावासका उपप्रमुख सुशील लम्सालले वुहान सहर भन्दा बाहिर रहेका नेपालीहरुलाई विमानस्थलसम्म ल्याउन मोटरको व्यवस्था भइसकेको जानकारी दिएका छन् ।
कोरोना भाइरस प्रकोपको केन्द्रविन्दु वुहान नै हो । सो सहर र आसपासको क्षेत्रमा संक्रमण रोक्न चीन सरकारले सार्वजनिक यातायात, हवाई सेवा बन्द गरेको छ । त्यसैगरी आवश्यक काम बाहेक बाहिर निस्कन समेत प्रतिबन्ध गरेको छ ।
हालसम्म कोरोना भाइरसका संक्रमितको संख्या ५० हजार पुगेको छ भने १ हजार ३ सयको मृत्यु भइसकेको छ । संक्रमितमध्ये ९९ प्रतिशत चीनका नागरिक रहेका छन् ।
चीनबाट फर्काएर ल्याउने नेपालीको वुहान र काठमाडौं दुवै स्थानमा स्वाथ्य परीक्षण हुने छ । संक्रमणको लक्षण देखिए उनीहरुलाई उपचारका लागि अस्पताल भर्ना गरिने छ भने कुनै लक्षण नभए दुई साताको क्वारेन्टाइनमा पठाइने छ ।