काठमाडौं । कमलादी काठमाडौंमा भेटिएको भनिएको साढे १४ किलो चाँदी र आधा किलो सुन प्रकरणमा थप दुई  जना सुन व्यवसायी पक्राउ परेका छन् ।

प्रहरीले गत भदौ १५ गते न्युरोडका लक्की ज्वेलर्सका श्रीनिवास उपाध्याय र अष्टमंगल ज्वेलर्सका विजय ताम्राकारलाई पक्राउ गरेको हो ।

उनीहरूविरूद्ध पनि प्रहरीले संगठित अपराधको कसूरमा अनुसन्धान अघि बढाएको छ । तस्करहरूले आधा किलो सुन लक्की ज्वेलर्सका श्रीनिवास उपाध्यायसँग किनेका थिए । उपाध्यायले भने अष्टमंगल ज्वेलर्सका विजय ताम्राकारसँग किनेका थिए।

महानगरीय प्रहरी परिसर, काठमाडौंका एसपी सोमेन्द्र सिंह राठौरका अनुसार ताम्राकारले भने आधा केजी सुन नेपाल राष्ट्र बैंकबाट किनेका थिए ।

त्यस्तै, उनीहरूले चाँदी भने न्युरोडको सिल्भर स्टेटबाट किनेका थिए । प्रहरीले त्यसको सञ्चालकलाई भने पक्राउ गरेको छैन। यस प्रकरणको अनुसन्धानलाई अन्तिम चरणमा पुगिसकेको एसपी राठौरले बताए।

अहिले उक्त सुन प्रकरणमा दुई जना व्यवसायीसहित ११ जना हिरासतमा छन् । हिरासतमा रहेका तस्करहरू इल्ताफ हुसेन अन्सारी, निलेश शाखिया, कौशल पटेल, देवानसिंह पटेल, विजय पटेल, प्रहरी जवान प्रसन्न श्रेष्ठ र उनका घरबेटी उमेश श्रेष्ठ, प्रहरी जवान बहादुरसिंह कडायत र कालिगढ मनिष छन् ।