काठमाडौँ । नेपाल लाइफ इन्स्योरेन्स कम्पनीले सम्पत्ति शुद्धीकरण तथा आतङ्ककारी कार्यमा वित्तीय लगानी निवारण सम्बन्धी विशेष प्रशिक्षण कार्यक्रम सम्पन्न गरेको छ। काठमाडौंमा आयोजित कार्यक्रममा कम्पनीका सञ्चालक समिति, उच्च व्यवस्थापन र विभागीय प्रमुखहरूको सहभागिता थियो।

प्रशिक्षणमा नेपाल राष्ट्र बैंकका निर्देशक एवं विज्ञ डा. हरि कुमार नेपालले बीमा क्षेत्रको कानुनी व्यवस्था, जोखिम पहिचान, ग्राहक पहिचान र शंकास्पद कारोबार पहिचानका विषयमा जानकारी दिए। उनले अन्तर्राष्ट्रिय अभ्यास र व्यवहारिक कार्यान्वयनका पक्षबारे विस्तृत प्रस्तुति दिएका थिए।

सो अवसरमा कम्पनीका सञ्चालक कमलेश कुमार अग्रवालले संस्थागत सुशासन र अनुपालनले नै कम्पनीलाई सुरक्षित र दिगो बनाउने बताए।

प्रमुख कार्यकारी अधिकृत प्रवीण रमण पराजुलीले नियामकीय आवश्यकतालाई कम्पनीको दैनिक कार्यप्रणालीमा प्रभावकारी रूपमा लागू गरिएको जानकारी दिए। वित्तीय पारदर्शिता सुदृढ बनाउन र वित्तीय अपराध न्यूनीकरण गर्न यस्ता कार्यक्रमले सहयोग पुग्ने कम्पनीले जनाएको छ।