सार्क चेम्बर अफ कमर्श एण्ड इन्डष्ट्रिकाे पर्यटक समितिकाे संयाेजकमा चन्द्र प्रसाद ढकाल चयन
काठमाडौं । सार्क चेम्बर अफ कमर्स एन्ड इन्डस्ट्री (सार्क सीसीआई) को पर्यटन समितिको संयोजकमा नेपालका पर्यटन तथा बैंकिङ व्यवसायी चन्द्र प्रसाद ढकाल चयन भएका छन । हालै माल्दिभ्समा सम्पन्न सार्क चेम्बरको ८८औँ कार्यकारी समितिको बैठकले उनलाई उक्त जिम्मेवारी प्रदान गरेको छ ।
नेपाल उद्योग वाणिज्य महासंघका निवर्तमान अध्यक्षसमेत रहेका ढकाल नेपालको प्रतिष्ठित व्यावसायिक घराना आइएमई समूहका अध्यक्ष हुन । उनी चन्द्रागिरी हिल्सलगायत नेपालका सातवटै प्रदेशमा पर्यटन पूर्वाधार विकासका साथै स्वदेशी ‘इला’ होटल चेन ब्रान्डको प्रवर्द्धक तथा लगानीकर्ताका रूपमा परिचित छन ।
संयोजक ढकालले दक्षिण एसियाको भौगोलिक बनावट र सांस्कृतिक विविधता विश्वमै अद्वितीय रहेकाले यस क्षेत्रलाई विश्वकै उत्कृष्ट पर्यटकीय गन्तव्यका रूपमा विकास गर्न सकिने बताएका छन । सर्वोच्च शिखर सगरमाथाको हिमशृङ्खलादेखि हिन्द महासागरका टापु, विशाल समुद्री तट, जङ्गल, मरुभूमि तथा समृद्ध धार्मिक र ऐतिहासिक सम्पदाहरूले यस क्षेत्रमा पर्यटनको अपार सम्भावना बोकेको उनले बताएका छन ।
विश्वको करिब एक चौथाइ जनसंख्या बसोबास गर्ने दक्षिण एसिया आफैँमा एक विशाल आन्तरिक पर्यटन बजार रहेको उल्लेख गर्दै ढकालले यो सम्भावनालाई यथार्थमा बदल्न समग्र सार्क क्षेत्रमै पर्यटन पूर्वाधारको स्तरोन्नति र लगानी विस्तार अपरिहार्य रहेको बताएका छन ।
यस क्षेत्रका प्रतिष्ठित होटल तथा आतिथ्य ब्रान्डहरूलाई एकअर्काको देशमा विस्तार गर्ने वातावरण बनाउनुपर्नेमा जोड दिँदै संयोजक ढकालले कार्यकारी समितिकाे बैठकमा ‘अन्तरदेशीय लगानी विस्तारले पुँजीसँगै ज्ञान, सीप र प्रविधिको आदानप्रदानलाई समेत टेवा पुर्याउँछ ।
नेपालकै सन्दर्भमा पनि सार्क राष्ट्रका लगानीकर्ता र स्थापित होटल चेनहरूलाई यहाँको पर्यटन पूर्वाधारमा आकर्षित गर्दै नेपाली आतिथ्य क्षेत्रको अनुभवलाई क्षेत्रीय स्तरमा जोड्न सकिन्छ ।’ भनेका छन।
क्षेत्रीय पर्यटन प्रवर्द्धनका लागि ‘सार्कभित्रै घुमौँ’ भन्ने भावनाका साथ अन्तरक्षेत्रीय पर्यटन अभियान सञ्चालन गर्न आवश्यक रहेको ढकालले औँल्याएका छन । विभिन्न देशका गन्तव्यहरूलाई समेटेर साझा पर्यटन सर्किट र प्याकेज निर्माण गर्दै धार्मिक, सांस्कृतिक, पर्यावरणीय तथा साहसिक पर्यटनमा आपसी आदानप्रदान बढाउन सकिने उनको धारणा छ ।
क्षेत्रीय पर्यटन विकासको मुख्य आधार सहज सम्पर्क सञ्जाल (कनेक्टिभिटी) रहेको उल्लेख गर्दै उनले सार्क राष्ट्रका प्रमुख सहरहरूबीच सीधा हवाई तथा स्थलमार्गको पहुँच विस्तार गर्न सके पर्यटक, व्यवसायी र लगानीकर्ताको आवागमनमा तीव्रता आउने बताएका छन ।
यसै क्रममा नेपालका अन्तर्राष्ट्रिय विमानस्थलहरूलाई पनि सार्कका प्रमुख गन्तव्यहरूसँग सीधा हवाई सम्पर्कमा जोड्न सकिएमा क्षेत्रीय पर्यटन प्रवर्द्धनमा ठूलो टेवा पुग्ने उनले विश्वास व्यक्त गरेका छन ।
यी लक्ष्य हासिल गर्न सार्क राष्ट्रका सरकार र निजी क्षेत्रबीचको बलियो सहकार्य अनिवार्य रहेको बताउँदै संयोजक ढकालले नीतिगत समन्वय र व्यावसायिक साझेदारीका लागि सार्क चेम्बरजस्ता क्षेत्रीय मञ्चहरूले पुलको काम गर्न सक्ने उल्लेख गरेका छन ।
ढकालले बैठकमा समग्र दक्षिण एसियाको साझा पर्यटन विकास र समृद्धिका लागि परिणाममुखी भूमिका निर्वाह गर्न आफू प्रतिबद्ध रहेको समेत धारण व्यक्त गरेका छन ।
माल्दिभ्समा सम्पन्न सार्क चेम्बर अफ कमर्स एन्ड इन्डस्ट्री (SAARC CCI) को ८८ औँ कार्यकारी समितिको बैठकमा सदस्य राष्ट्रहरूबीच व्यापार, पर्यटन, लगानी र क्षेत्रीय सहकार्यका विषयमा गहन छलफल भएकाे छ। जनसंख्या, भूगोल र विकासको सम्भावनाले सार्क क्षेत्रलाई विश्वकै महत्त्वपूर्ण र सम्भावनायुक्त क्षेत्र बनाएको छ।
विश्वको करिब एक चौथाइ जनसंख्या यहीँ बसोबास गर्छ र अर्थतन्त्र द्रुत गतिमा अघि बढिरहेको छ। तर क्षेत्रभित्रको आपसी व्यापार अत्यन्त न्यून छ। यो सम्भावनालाई वास्तविक विकासमा बदल्न सार्क राष्ट्रका सरकार र निजी क्षेत्रबीच सहकार्य अपरिहार्य छ।
सार्क राष्ट्रका निजी क्षेत्रले एकआपसमा सहज र विश्वासिलो वातावरणमा काम गर्न पाए धेरै सम्भावना खुल्छन्। व्यापार विस्तार, संयुक्त लगानी, पर्यटन, जलविद्युत र नवीकरणीय ऊर्जा, कृषि र खाद्य प्रशोधन, सूचना प्रविधि, बैंकिङ र यातायातमा धेरै काम गर्न सकिन्छ। सार्क चेम्बर जस्ता क्षेत्रीय मञ्चहरूको भूमिका यसमा महत्त्वपूर्ण रहन्छ ।
























