काठमाडौं । राष्ट्रिय स्वतन्त्र पार्टी (रास्वपा) को सचिवालय बैठक आजका लागि बोलाइएको छ । पार्टी सभापति रवि लामिछानेले बैठक आह्वान गरेका हुन् । बैठकले जिल्ला अधिवेशन, बैंक खाता, केन्द्रीय आयोग मनोनयन र महाधिवेशन तयारीका विषय छलफल गर्नेछ । पार्टीका अनुसार बैठक आज दिउँसो ३ः३० बजे वनस्थलीस्थित केन्द्रीय कार्यालयमा बस्नेछ ।

बैठकमा जिल्ला अधिवेशन कार्यविधि २०८३, बैंक खाता सञ्चालन, केन्द्रीय आयोग तथा सल्लाहकार परिषद् लगायतका संरचनामा मनोनयनका विषयमा छलफल हुने जनाइएको छ ।

त्यसैगरी महाधिवेशन कार्यविधि मस्यौदा समिति गठन, विज्ञ तथा योजना प्रस्ताव आह्वानसम्बन्धी विषय पनि कार्यसूचीमा समावेश गरिएको छ ।

यससँगै प्रतिनिधिसभा सदस्यहरूको संगठनात्मक जिम्मेवारी, केन्द्रीय समिति बैठक तथा संसदीय दलका लागि प्राविधिक सहयोग लगायत विषयमा समेत छलफल हुने बताइएको छ ।