युनाइटेड अजोड इन्स्योरेन्सको खुद नाफासँगै बढ्यो इपीएस

काठमाडौं स् युनाइटेड अजोड इन्स्योरेन्स लिमिटेडले चालु आर्थिक वर्षको तेस्रो त्रैमाससम्म आइपुग्दा २७ करोड ४२ लाख २४ हजार रुपैयाँ खुद नाफा कमाएको छ ।
उक्त नाफा गत आर्थिक वर्षको सोही अवधिको १८ करोड ७७ लाख रुपैयाँको तुलनामा ४६.०६ प्रतिशतले धेरै हो । खुद बिमा शुल्क आम्दानीका साथै लगानी तथा कर्जाबाट हुने आम्दानी र कमिसनबाट हुने आम्दानी बढ्दा खुद नाफामा सुधार देखिएको हो ।
यसअवधिमा खुद बिमा शुल्क आम्दानी ८१.५७ प्रतिशतले बढेर ७८ करोड ४४ लाख रुपैयाँ पुगेको छ । यता, लगानी तथा कर्जाबाट हुने आम्दानी ७४.८६ प्रतिशतले बढेर २५ करोड ६८ लाख रुपैयाँमा पुगेको छ ।
युनाइटेड अजोड इन्स्योरेन्स चुक्ता पुँजी १ अर्ब ९० करोड ४५ लाख ६८ हजार रुपैयाँ छ । यसको रिटेन्ड अर्निङमा २८ करोड ५४ लाख रुपैयाँ देखिएको छ । इन्स्योरेन्सको प्रतिसेयर आम्दानी १९.२० रुपैयाँ कायम भएको छ । प्रतिसेयर नेटवर्थ २०३.७८ रुपैयाँ छ ।