काठमाडौं। प्रधानमन्त्री शेरबहादुर देउवाले नेपाल विद्युत् प्राधिकरणको कार्यकारी निर्देशकमा कुलमान घिसिङलाई नियुक्त गर्न निर्देशन दिएका छन्। प्रधानमन्त्री देउवाले उर्जा, जलस्रोत तथा सिचाई मन्त्री पम्फा भुसाललाई बोलाएर कुलमान घिसिङलाई प्राधिकरण प्रमुखमा नियुक्त गर्न निर्देशन दिएका छन्।

प्रधानमन्त्री देउवाको निर्देशनपछि कुलमान धिसिङलाई प्राधिकरणको कार्यकारी निर्देशक नियुक्त गर्ने ‘प्रक्रिया’ समेत सुरु भइसकेको छ। प्रधानमन्त्रीको निर्देशनपछि उर्जामन्त्री भुसालले प्राधिकरणका कार्यकारी निर्देशक हितेन्द्रदेव शाक्यलाई बोलाएर पदबाट राजीनामा दिन भनेकी छन्।

शाक्यले प्राधिकरण प्रमुखको जिम्मेवारी सम्हालेयता प्राधिकरणको नाफा घटेको, अनधिकृत रुपमा विद्युत् कटौती हुने क्रम र विद्युत् चुहावट बढेको भन्दै प्रधानमन्त्री देउवाले कुलमानलाई नै प्राधिकरणको नेतृत्वमा ल्याउन भनेका हुन्।

घिसिङले यस अघि पनि ४ वर्ष प्राधिकरणको कार्यकारी निर्देशकको जिम्मेवारी निर्वाह गरेका थिए। दैनिक १८ घण्टासम्म हुने विद्युत् कटौती (लोडसेडिङ) अन्त गरेका कुलमानले प्राधिकरणको व्यवस्थापनमा पनि ‘उल्लेख्य’ सुधार गरेका थिए।

घिसिङको कार्यकाल २०७७ भदौं २८ गते सकिएको थियो। त्यतिबेला पनि घिसिङलाई नै प्राधिकरणको कार्यकारी निर्देशकमा पुनर्नियुक्ति गरिनु पर्ने आवाज उठेपनि तत्कालीन प्रधानमन्त्री केपी शर्मा ओलीले त्यसमा ‘रुची’ देखाएका थिएनन्।

घिसिङको कार्यकाल सकिएको झण्डै ५ महिनापछि २७ माघ २०७७ मा सरकारले हितेन्द्रदेव शाक्यलाई प्राधिकरणको कार्यकारी निर्देशक नियुक्त गरेको थियो।