काठमाडौं । सन् २०२५ की मिस नेपाल लुना लुईंटेल मिस वर्ल्ड प्रतियोगितामा भाग लिन भियतनाम प्रस्थान गरेकी छन् । उनी हिजो बेलुकी त्रिभुवन अन्तर्राष्ट्रिय विमानस्थलबाट भियतनामतर्फ उडेकी हुन् ।

लुनालाई विमानस्थलमा आफन्त, साथीभाइ र मिस नेपाल आयोजक हिडन ट्रेजरका पदाधिकारीले स्वागत गरेका थिए । प्रस्थान गर्नुअघि उनले प्रतियोगितामा आफूले सम्पूर्ण शक्ति लगाएर प्रयास गर्ने बताइन् ।

उनले भनिन्, ‘मैले यस प्रतियोगिताका लागि करिब एक वर्षदेखि तयारी गरिरहेकी छु। म आफ्नो सम्पूर्ण शक्ति लगाएर प्रयास गर्नेछु र आशा छ यस पटक म मात्र होइन, नेपालले अन्तर्राष्ट्रिय मञ्चमा केही ठूलो र गर्विलो काम गर्नेछ ।’

मिस वर्ल्डमा नेपालले हरेक वर्ष भाग लिँदै आए पनि कुनै पनि सुन्दरीले माथिल्लो चरणमा स्थान बनाउन सकेका छैनन् । तर, ब्यूटी विथ द प्रपोज विधामा भने लगातार उत्कृष्ट नतिजा ल्याइरहेको छ । त्यसैले लुनालाई पनि कम्तिमा यो विधामा उत्कृष्ट प्रदर्शन गर्ने दवाव छ । तर दवावलाई उनले सकारात्मकरूपमा लिएकी छन् ।

उनी भन्छिन्, ‘जब जिम्मेवारी हुन्छ, दबाब हुनु स्वभाविक हो । तर म के विश्वास गर्छु भने यदि दबाब छैन भने त्यहाँ कुनै अपेक्षा नै हुँदैन । यदि अपेक्षा छैन भने त्यहाँ कुनै जीत हुने छैन । त्यसैले नेपाली जनताले ममा जुन विश्वास देखाउनुभएको छ, म आफ्नो १०० प्रतिशत दिनेछु । म कुनै निश्चित स्थानको प्रतिज्ञा त गर्न सक्दिनँ, तर म के वाचा गर्न सक्छु भने म आफ्नो तर्फबाट जे गर्न सक्छु, त्यो सबै दिनेछु ।’

लुनाले आफूसँगै ३ करोड नेपालीहरूको साथ र माया बोकेर गइरहेको बताइन् । आफ्नो लागि मात्र होइन, नेपालका लागि भोट गरिदिन उनले अपिल गरेकी छन् ।
मिस वर्ल्ड २०२६ मा १२० भन्दा बढी देशले भाग लिँदैछन् ।