काठमाडौं । बैंक तथा फाईनान्स कम्पनीहरुको चुक्ता पुँजी पछिल्लो एक वर्षमा झण्डै १५ अर्ब रुपैंयाँले बढेको छ । नेपाल राष्ट्र बैंकका अनुसार चालु आर्थिक वर्षको पुस मसान्तसम्ममा बैंक तथा फाईनान्स कम्पनीहरुको कुल चुक्ता पुँजी चार खर्ब २३ अर्ब ७५ करोड ८० लाख रुपैंयाँ पुगेको छ ।

बैंकिङ क्षेत्रले हाल कायम गरेको यो चुक्ता पुँजी गत आवको सोही अवधिको तुलनामा १५ अर्ब ४९ करोड ४० लाख रुपैंयाँले बढेको हो ।

राष्ट्र बैंकका अनुसार गत आ.वको सोही अवधिमा भने बैंकिङ क्षेत्रको यस्तो चुक्ता पुँजी चार खर्ब आठ अर्ब २६ करोड ४० लाख रुपैंयाँ रहेको थियो ।

बैंकिङ क्षेत्रको हाल कायम रहेको चुक्ता पुँजी मध्येमा बाँणिज्य बैंकहरुको मात्र चुक्ता पुँजी भने तीन खर्ब ६९ अर्ब ७२ करोड ४० लाख रुपैंयाँ रहेको छ ।

बाणिज्य बैंकहरुको यो चुक्ता पुँजी गत आ.वको सोही अवधिको तुलनामा १० अर्ब ६४ करोड ४० लाख रुपैंयाँले बढी हो । गत आवको सोही अवधिमा बैंकहरुको यस्तो चुक्ता पुँजी तीन खर्ब ५९ अर्ब आठ करोड रुपैंयाँ रहेको थियो ।

बिकास बैंकहरुको चुक्ता पुँजी भने चालु आवको पछिल्लो अवधिमा ३९ अर्ब १७ करोड ६० लाख रुपैंयाँ रहेको छ । यो चुक्ता पुँजी गत आवको सोही अवधिको तुलनामा तीन अर्ब ७० करोड ४० लाख रुपैंयाँले बढी हो ।

गत आवको सोही अवधिमा बिकास बैंकहरुको यस्तो चुक्ता पुँजी ३५ अर्ब ४७ करोड २० लाख रुपैंयाँ रहेको थियो । यसैगरी फाईनान्स कम्पनीहरुको चुक्ता पुँजी पनि पछिल्लो अवधिमा १४ अर्ब ८५ करोड ८० लाख रुपैंयाँ पुगेको छ ।

यो चुक्ता पुँजी गत आवको सोही अवधिको तुलनामा एक अर्ब १४ करोड ५० लाख रुपैंयाँले बढी हो । गत आवको सोही अवधिमा भने फाईनान्स कम्पनीहरुको यस्तो चुक्ता पुँजी १३ अर्ब ७१ करोड ३० लाख रुपैंयाँ रहेको थियो ।