काठमाडौं । १० दिनमा बैंक तथा वित्तीय संस्थाबाट सात अर्ब निक्षेप बाहिरिएको छ । गत ४ वैशाखमा बैंक तथा वित्तीय संस्थाको कुल निक्षेप ६१ खर्ब ३९ अर्ब थियो । त्यसको १० दिनपछि १३ वैशाखमा निक्षेप संकलन घटेर ६१ खर्ब ३२ अर्ब कायम भएको छ ।

सो अवधिमा बैंक तथा वित्तीय संस्थाको कर्जा प्रवाह तीन अर्बले घटेको छ । ४ वैशाखसम्म ५१ खर्ब पाँच अर्ब कर्जा प्रवाह भएकोमा घटेर १० दिनपछि ५१ खर्ब दुई अर्ब कायम भएको छ ।

निक्षेप बाहिरिनेमा सबैभन्दा ठूलो हिस्सा वाणिज्य बैंकको छ । वाणिज्य बैंकहरूबाट चार अर्ब निक्षेप बाहिरिएको छ । ४ वैशाखमा वाणिज्य बैंकहरूको निक्षेप संकलन ५४ खर्ब २४ अर्ब रहेकोमा १३ वैशाखमा ५४ खर्ब २० अर्ब कायम भएको छ ।

यस अवधिमा वाणिज्य बैंकहरूको कर्जाप्रवाह पनि चार अर्बले घटेको छ । ४ वैशाखमा ४५ खर्ब १६ अर्ब रहेको कर्जा प्रवाह घटेर १३ वैशाखमा ४५ खर्ब १२ अर्ब कायम भएको छ ।

निक्षेप बाहिरिने क्रम बढ्दै जाँदा कर्जा निक्षेपको अनुपातमा (सिडी रेसियो)समेत चाप पर्न थालेको छ । ४ वैशाखमा ८०.८२ प्रतिशत रहेको यस्तो अनुपात ११ वैशाखमा बढेर ८०.८६ प्रतिशत कायम भएको छ ।

१० दिनमा निक्षेप घटेको भए पनि पछिल्लो दुई दिनमा निक्षेपमा वृद्धि भइरहेको देखिन्छ । बैंकहरू निक्षेप संकलनमा ११ वैशाखसम्म ओरालो लागे पनि त्यसपछि बढेको हो ।

४ देखि ११ वैशाखसम्म आइपुग्दा १३ अर्बले निक्षेप बाहिरिएको थियो । त्यसपछिको दुई दिनमा आठ अर्बले निक्षेप बढेको छ ।