काठमाडौं । हिमालयन बैंकले चालु आर्थिक वर्षको पहिलो त्रैमाससम्म १ अर्ब ५ करोड ६१ लाख रुपैयाँ खुद नाफा आर्जन गरेको छ । यो गत वर्षको यसैअवधिको भन्दा ९८.३५ प्रतिशतले धेरै हो । गत वर्ष यसले ५३ करोड २४ लाख रुपैयाँ नाफा कमाएको थियो ।

खुद ब्याज आम्दानीमा आएको वृद्धिका कारण यसको नाफा बढेको हो । त्यसका साथै, यस बैकको सञ्चालन नाफा पनि बढेको छ । समीक्षा अवधिसम्म यस बैंकले ३ अर्ब १७ करोड रुपैयाँ खुद ब्याज आम्दानी गरेको छ । यो गत वर्षको भन्दा ७५.८६ प्रतिशतले धेरै हो ।

गत वर्ष यसको खुद ब्याज आम्दानी १ अर्ब ८० करोड रुपैयाँ रहेको थियो । त्यसैगरी, सञ्चालन नाफा ९१.०४ प्रतिशतले बढेर १ अर्ब ५० करोड पुगेको छ । गत वर्ष उक्त नाफा ७८ करोड ९४ लाख रुपैयाँ रहेको थियो । यस बैंकले इम्पेयरमेन्ट चार्ज बापत ७५ करोड ६६ लाख रुपैयाँ छुट्याएको छ ।

गत वर्ष ६५ करोड ८९ लाख रुपैयाँ उक्त शीर्षकमा छुटयाएको थियो । खराब कर्जा बढ्दा यसको इम्पेयरमेन्ट चार्ज पनि बढेको हो ।

गत वर्ष २.३१ प्रतिशत रहेको यसको खराब कर्जा अहिले बढेर ४.६७ प्रतिशत पुगेको छ । हिमालयन बैंकको वितरणयोग्य नाफा भने १ अर्ब १६ करोड रुपैयाँ ऋणात्मक छ ।हाल यस बैंकको चुक्ता पुँजी २१ अर्ब ६५ करोड रुपैयाँ रहेको छ ।

यसको जगेडाकोषमा १७ अर्ब ७ करोड रुपैयाँ जम्मा रहेको छ । यसको प्रतिसेयर आम्दानी ३ रुपैयाँ ९ पैसाले बढेर १९ रुपैयाँ ५१ पैसा कायम भएको छ । गत वर्ष प्रतिसेयर आम्दानी १६ रुपैयाँ ४२ पैसा रहेको थियो । यसको प्रतिसेयर नेटवर्थ १७० रुपैयाँ २७ पैसा रहेको छ ।

१७ कात्तिक २०८०, शुक्रवार १२:५४ बजे प्रकाशित