चिनियाँ ईभी स्टार्टअप कम्पनी लिपमोटरले विश्व अटो बजारमा एक नयाँ किर्तिमान रचेको छ । बहुराष्ट्रिय अटोमोबाइल कम्पनी ’स्टेलान्टिस’को लगानी र समर्थन रहेको लिपमोटरले विश्व बजारमा १५ लाख युनिट ईभी बिक्री पुरा गरेको हो ।

सन् २०१९ को जुन महिनामा आफ्नो पहिलो सवारी साधन डेलिभरी गरेर व्यावसायिक यात्रा सुरु गरेको लीपमोटरले छोटो समयमै ठूलो फड्को मारेको हो ।

कम्पनीले अक्टोबर २०२४ मा ५ लाख युनिट बिक्री पुरा गरेकोमा अक्टोबर २०२५ मा १० लाख पुरा गरेको थियो । थप ५ लाख युनिट कार ७ महिनामै बिक्री गरेको कम्पनीले गत मे महिनामा मात्रै ८१ हजार ५६९ युनिट बिक्री गरेको थियो ।

लिपमोटरले चालु वर्ष २०२६ भित्र मात्रै विश्वभर १० लाख कार बिक्री गर्ने महत्त्वाकांक्षी योजना बनाएको छ । यस लक्ष्य अन्तर्गत चिनियाँ घरेलु बजारमा ८ लाख ५० हजारदेखि ९ लाख युनिट र अन्तर्राष्ट्रिय बजारमा १ लाखदेखि १ लाख ५० हजार युनिट बिक्री गर्ने रणनीति कम्पनीको छ ।

हाल विश्वका ४० भन्दा बढी देशमा २ हजारभन्दा बढी आउटलेटहरूको बलियो नेटवर्क बनाएको लिपमोटरले अन्तर्राष्ट्रिय व्यापारबाट राम्रो नाफा कमाउन थालेको छ । विशेष गरी इटालीको ईभी बजारमा लिपमोटरको बजार हिस्सा ३० प्रतिशतभन्दा बढी रहेको जनाइएको छ ।

लिपमोटरले चालु वर्षको दोस्रो त्रैमासिकदेखि युरोपमा आफ्नै प्लान्ट निर्माण सुरु गर्दैछ । साथै, चौथो त्रैमासिकदेखि स्टेलान्टिसको स्पेनस्थित प्लान्टमार्फत स्थानीय रूपमा सीकेडी एसेम्बली सुरु गर्ने तयारी गरेको छ ।