काठमाडौं। आगामी २९ र ३० गते नेपाली कांग्रेस निकट श्रमिकको छाता सङ्गठन नेपाल ट्रेड युनियन कांग्रेसको राष्ट्रिय सम्मेलन काठमाडौंमा हुने भएको छ।

ट्रेड युनियन कांग्रेसको बिहीबार केन्द्रीय कार्यालय अनामनगरमा बसेको केन्द्रीय कार्यसमितिको बैठकले जेठ २९ र ३० गते नेपाल प्रज्ञा प्रतिष्ठान कमलादीमा सम्मेलन आयोजना गर्ने निर्णय गरेको हो।

ट्रेड युनियन कांग्रेसका उपाध्यक्ष एवं सम्मेलन प्रचारप्रसार समितिका संयोजक अजयकुमार राईले दुई दिनसम्म चल्ने सम्मेलनमा देशभरबाट एक हजार ६०० प्रतिनिधि सहभागी हुने जानकारी दिए।

दुई दिनसम्म चल्ने सम्मेलनको पहिलो दिन अर्थात् २९ जेठमा हुने उद्घाटनसत्रमा पार्टी सभापति एवं प्रधानमन्त्री शेरबहादुर देउवा, पार्टीका नेता डा। शेखर कोइराला, गृहमन्त्री बालकृष्ण खाँणलगायत नेताले सम्बोधन गर्ने कार्यक्रम रहेको छ।

सम्मेलनको पहिलो दिन नै योगदानमा आधारित सामाजिक सुरक्षाबारे विषयगत सम्मेलन र श्रमिकको कार्यलयस्थलमा हुने हिंसा तथा दुर्व्यवहारसम्बन्धी आईएलओ महासन्धि, १९० बारे विषयगत सम्मेलन हुने कार्यक्रम रहेको छ।

सम्मेलनको दोस्रो दिन बन्दसत्रको कार्यक्रम रहेको छ। बन्दसत्रमा बढ्दो महँगीका कारण श्रमिकमा परेको प्रभाव, नेपाल ट्रेड युनियन कांग्रेसको विधान संशोधनलगायतको बारेमा छलफल हुने प्रचारप्रसार समितिका संयोजक राईले बताए। यस्तै, सम्मेलनले श्रमिकका जल्दोबल्दो वर्तमान समस्यालाई समाधान गर्ने बताइएको छ।

ट्रेड युनियन कांग्रेसको विधानमा राष्ट्रिय महाधिवेशन सम्पन्न भएको दुई वर्षभित्र राष्ट्रिय सम्मेलन सम्पन्न गर्नुपर्ने प्रावधान भए पनि कोरोना महामारीका कारण उक्त सम्मेलन महाधिवेशन सम्पन्न भएको चार वर्षपछि हुन लागेको हो। महाधिवेशन हरेक चार वर्षमा हुने विधानमा उल्लेख छ।

उक्त सम्मेलनले महाधिवेशनको नयाँ मिति तोक्ने कार्यक्रमसमेत रहेको उपाध्यक्ष राईले बताए। ट्रेड युनियन कांग्रेसमा देशभरका औपचारिक तथा अनौपचारिक क्षेत्रमा कार्यरत विभिन्न २७ ओटा श्रमिक सङ्घ, सङ्गठन आबद्ध रहेका छन् भने चार लाखभन्दा बढी श्रमिक सदस्य रहेका छन्।