काठमाडौं। बैंकिङ कसुरमा दोषी ठहर भई फरार रहेका एक अपराधी अरविन्द जैसवाललाई प्रहरीको केन्द्रीय अनुसन्धान ब्यूरोले हिजो फागुन २९ गते पक्राउ गरेको छ ।

पक्राउ पर्नेमा रौतहटको गौर नगरपालिका–१ भन्सारटोल घर भई काठमाडौंको बूढानीलकण्ठ बस्ने अविन्दकुमार जैसवाल रहेका छन् ।

जैसवालले प्रभु बैंक कपन शाखामा रहेको आफ्नो खातामा पर्याप्त नगद मौज्दात रकम नभएको भन्ने जानी–जानी पीडितलाई झुक्यानमा पारेर चेक दिएका थिए । उक्त चेकको रकम भुक्तान हुन नसकेको ठहर गर्दै उच्च अदालत पाटनबाट गत मंसिर १४ गते बैंकिङ कसुर तथा सजाय ऐन २०६४ बमोजिमको कसुरमा ९ लाख रूपैयाँ जरिवाना र दुई दिन कैद हुने फैसला भएको थियो ।

त्यसपछि फरार रहेका जैसवाललाई ब्यूरोले कपनबाट फागुन २९ गते नै पक्राउ गरी फैसला कार्यान्वयन लागि काठमाडौं जिल्ला अदालतमा पेस गरेको जनाएको छ।