विराटनगर । जिल्ला प्रशासन कार्यालय मोरङले अनुमति नै नलिई कोरोना सङ्क्रमितको उपचार गरेको भन्दै म्याक्स अस्पताल बन्द गर्न निर्देशन दिएको छ ।

अस्पतालले सरकारी निकायको अनुमति नलिनुका साथै कोभिड संक्रमणसम्बन्धी न्यूनतम आवश्यक पूर्वाधारसमेत तयार नगरी कोरोना सङ्क्रमितको उपचार गरिरहेको पाइएकाले त्यसलाई बन्द गराइएको जिल्ला प्रशासनले जनाएको छ ।

मोरङका प्रमुख जिल्ला अधिकारी कोशहरि निरौलाका अनुसार अस्पतालले उपचारका लागि न्यूनतम सर्त पुरा नगरुन्जेलसम्मका लागि अस्पताल बन्द गर्न निर्देशन दिइएको हो ।

‘न्यूनतम सर्तहरू पुरा नगरेको कारणले हामीले रोकेका छौँ’ प्रजिअ निरौलाले भने, ‘त्यो पुरा हुन सक्यो भने ठिक छ, हुन सकेन भने कारबाही हुन्छ’

टिनको छाना मुनी राखेर हेर्नै नहुने अवस्थामा अस्पताल सञ्चालन गरिएको र अति नै चर्को शुल्क लिने गरेको भन्ने उजुरीका आधारमा जिल्ला प्रशासन कार्यालयले अस्पतालको अनुगमन गरेको थियो । अनुगमनका क्रममा सामान्य भौतिक पूर्वाधार समेत नभएको भेटिएको छ ।

अस्पतालले सरकारी अनुमति र स्वीकृतिबिना संवेदनशील सेवा सञ्चालन गर्नुको कारणबारे लिखित जवाफ समेत माग गरिएको प्रजिअ निरौलाले बताए ।

‘अस्पतालले कोभिडका बिरामीबाट दैनिक ८० हजार रुपैयाँसम्म असुलेको उजुरी जिल्ला प्रशासनमा परेको छ’ जिल्ला प्रशासन स्रोतले भन्यो, ‘बिरामीका आफन्तले दिनको ५० देखि ८० हजार रुपैयाँसम्म तिरेको गुनासो गरेपछि प्रशासनले अनुगमन गरेको थियो’

प्रशासनले अस्पताललाई पठाएको पत्रमा त्यहाँ उपचार गराइरहेका बिरामीलाई अन्यत्र व्यवस्थापन गर्न र नेपाल सरकारले तोकेभन्दा बढी उपचार शुल्क नलिन उल्लेख गरिएको छ । सरकारी शुल्क भन्दा बढी लिएको प्रमाणित भएमा कारबाही गर्ने प्रजिअ निरौलाले बताएका छन् ।

बिरामीको उपचार गर्दा सरकारले तोकेको आइसोलेसन सम्बन्धी निर्देशिका २०७७ लगायतका विधि र मापदण्ड पालना नगर्नको कारण माग गर्दै सङ्क्रामक ऐन २०२० अनुसार कारबाही किन नगर्ने रु अस्पतालसँग जबाफ माग गरिएको छ ।

सरकारी क्षेत्रबाट पर्याप्तरुपमा गर्न नसकेपछि निजी क्षेत्रलाई सघाउन अनुरोध गरिएको हो तर त्यसको अर्थ मनोमानी गर्न छुट दिएको भने कदापि होइन ।

पछिल्लो समय उपचारका नाममा केही अस्पतालहरूले अत्यधिक चर्को शुल्क असुल्ने गरेको गुनासो देशव्यापीरुपमा आएको छ । विपत्तिमा गरिब जनतालाई सघाउने भन्दा मौका यही हो भन्दै असुल्न खोज्नेलाई कानूनी कठघरामा उभ्याउनै पर्छ । साथै उपचारका क्रममा गरिने लापरबाहीलाई कदापि छुट दिइनु हुन्न ।