citizens life insurance long ad
stcnepal long ad
ime life insurance

५९४ मेगावाट विद्युत् आईएक्समा बिक्री गर्न अनुमति, कुल निर्यात स्वीकृति ११९८ मेगावाट पुग्यो

Nimb long ad
Prabhu Insurance Long Ad

काठमाडौं । नेपालले मध्यकालीन सम्झौताका स्वीकृत आयोजनाको ५९४ मेगावाट विद्युत् आईएक्समा बिक्री गर्न अनुमति पाएको छ । कुल निर्यात स्वीकृति ११९८ मेगावाट पुगेको हो ।

नेपाल विद्युत् प्राधिकरणले द्विपक्षीय मध्यकालीन विद्युत् बिक्री सम्झौता अन्तर्गत निर्यातका लागि स्वीकृति प्राप्त गरेको हो । भारतीय ऊर्जा एक्सचेन्ज (आईएक्स) मा बिक्री गर्ने अनुमति पाएको हो ।

भारतको विद्युत् मन्त्रालय अन्तर्गतको केन्द्रीय विद्युत् प्राधिकरणले मध्यकालीन सम्झौताका स्वीकृत आयोजनाहरूको विद्युत् आईएक्सको डेअहेड तथा रियल टाइम मार्केटमा बिक्री गर्न १८ नोभेम्बर २०२६ अनुमति दिएको हो । योसँगै नेपालबाट भारततर्फ निर्यातका लागि स्वीकृत कुल विद्युतको परिमाण ११९८ मेगावाट पुगेको छ ।

नयाँ अनुमति अनुसार ५९४ मेगावाट विद्युत् १८ नोभेम्बर २०२६ देखि १४ जुन २०२७ (२ मंसिर २०८३ देखि ३१ जेठ २०८४) सम्म आईएक्समा बिक्री गर्न सकिनेछ ।

अनुमतिप्राप्त परिमाण मध्ये २०५ मेगावाट विद्युत् कटैया–कुशाहा, रामनगर–सुरजपुर रहेको छ । रक्सौल–परवानीपुर १३२ केभी प्रसारण लाइनमार्फत तथा ३८९ मेगावाट विद्युत् ढल्केबर–मुजफ्फरपुर ४०० केभी प्रसारण लाइनमार्फत आईएक्समा बिक्री गरिने प्राधिकरणले जनाएको छ ।

प्राधिकरण र भारतका एनटीपीसी विद्युत् व्यापार निगम (एनभीभीएन) तथा पावर ट्रेडिङ कर्पोरेसन (पीटीसी) बीच भएको हो ।

यो द्विपक्षीय मध्यकालीन विद्युत् बिक्री सम्झौताअनुसार हरियाणा र बिहार राज्यमा हरेक वर्ष जुनदेखि अक्टोबरसम्म विद्युत् निर्यात हुँदै आएको छ ।

चालु वर्षका लागि सम्झौता अनुसार विद्युत् निर्यात गर्ने अवधि गत ३१ अक्टोबर (१४ कात्तिक) मा समाप्त भएको थियो ।

मध्यकालीन सम्झौता अन्तर्गत निर्यात हुँदै आएको विद्युत् वैकल्पिक बजारका रूपमा आईएक्समा बिक्री गर्न आवश्यक अनुमतिका लागि माग गरेको थियो ।

प्राधिकरणले निर्यात योग्य आयोजनाहरूको सूची अवधि समाप्त हुनुअघि नै भारतीय निकायमा पेस गरेको थियो ।

सोही प्रक्रिया र निरन्तरको पहलपछि हाल एनभीभीएनमार्फत ३८९ मेगावाट र पीटीसीमार्फत २०५ मेगावाट गरी ५९४ मेगावाट विद्युत् आईएक्समा बिक्री गर्ने अनुमति प्राप्त भएको प्राधिकरणका कार्यकारी निर्देशक दीर्घायु कुमार श्रेष्ठले बताए ।

भारतको केन्द्रीय विद्युत् प्राधिकरणले थप २१.३४ मेगावाट विद्युत् निर्यातका लागि पनि नेपाल विद्युत् प्राधिकरणलाई स्वीकृति दिएको छ ।

सेती खोला जलविद्युत आयोजनाबाट उत्पादित उक्त विद्युत् २ मंसिर २०८३ देखि १५ भदौ २०८४ (१८ नोभेम्बर २०२६ देखि ३१ अगस्ट २०२७) सम्म आईएक्समा बिक्री गर्न अनुमति प्राप्त भएको हो ।

प्राधिकरणले आन्तरिक खपतबाट बढी भएको वर्षायामको विद्युत् आईएक्सको डेअहेड तथा रियल टाइम मार्केटमा प्रतिस्पर्धी दरमा बिक्री गर्दै आएको छ  भने, द्विपक्षीय मध्यकालीन सम्झौता अनुसार भारतका हरियाणा र बिहारका साथै बंगलादेशमा समेत विद्युत् निर्यात गर्दै आएको छ ।

IME Life
kumari