अमेरिकी राष्ट्रपति डोनाल्ड ट्रम्पले कतारको राजधानी दोहामा मंगलबार इरानसँग बैठक हुने दाबी गरेका छन् । ट्रम्पले सामाजिक सञ्जाल ट्रुथ सोसलमार्फत उक्त जानकारी सार्वजनिक गरेका हुन् ।

उनले लेखेका छन्, ‘इरानले बैठकको प्रस्ताव गरेको छ । यो बैठक दोहामा हुनेछ ।’ ह्वाइट हाउसकी प्रेस सचिव क्यारोलिन लेभिटले पनि फक्स न्युजसँगकाे कुराकानीमा उक्त बैठकबारे जानकारी दिएकी हुन् ।

लेभिटका अनुसार अमेरिकी विशेष दूत स्टिभ विटकोफ र ट्रम्पका ज्वाइँ जेरेड कुशनर यसै साता इरानी प्रतिनिधिसँग वार्ताका लागि दोहा जाने कार्यक्रम छ ।

अमेरिका र इरानबीच जुन १७ मा १४ बुँदे समझदारीपत्रमा हस्ताक्षर भएको थियो । उक्त समझदारीमा दुवै पक्षले सबै मोर्चामा तत्काल र स्थायी रूपमा सैन्य गतिविधि अन्त्य गर्ने प्रतिबद्धता जनाएका थिए ।

तर, समझदारी भएको दुई साताभन्दा कम समयमै दुवै पक्षबाट पुनः आक्रमण भएपछि उक्त सहमति कार्यान्वयनमा चुनौती देखिएको छ ।

यस्तो अवस्थामा हुन लागेको भनिएको दोहाको बैठकलाई अमेरिका–इरान सम्बन्ध सुधार र तनाव कम गर्ने प्रयासका रूपमा हेरिएको छ ।