काठमाडौँ। सरकारले समस्याग्रस्त सहकारीका साना बचतकर्तालाई रकम फिर्ता दिन सुरु गरेसँगै पहिलो चरणमा पाँच वटा सहकारीका ६८८ जना पीडित बचतकर्ताले आफ्नो बचत फिर्ता पाएका छन् ।

समस्याग्रस्त सहकारी व्यवस्थापन समितिका अनुसार कान्तिपुर सहकारीका २१५, शिव शिखर बहुउद्देश्यीय सहकारीका ३७२ जना र पशुपति सहकारीका सात जना, कृषि विकास बहुउद्देश्यीय सहकारीका ८८ जना र नागरिक कल्याण सहकारी संस्थाका छ जना बचतकर्ताको रकम फिर्ता गरिएको हो ।

समस्याग्रस्त सहकारी व्यवस्थापन समितिका सदस्यसचिव रविन ढकालका अनुसार अहिले कम रकम बचत गरेका बचतकर्तालाई प्राथमिकतामा राखिएको छ । आगामी दिनमा बचत रकमका आधारमा वर्गीकरण गर्दै सबै बचतकर्तालाई रकम फिर्ता गरिने छ ।

समितिका अनुसार समस्याग्रस्त सहकारीमा करिब ७६ हजार बचतकर्ताको झन्डै ४६ अर्ब रुपियाँ फिर्ता गर्न बाँकी छ । तीमध्ये अधिकांश साना बचतकर्ता छन् ।

सरकारले सहकारीका ऋणीबाट रकम असुलीलाई पनि तीव्र बनाएको जनाएको छ । हालसम्म समस्याग्रस्त सहकारीका ऋणीबाट दुई करोड ५० लाख रुपियाँभन्दा बढी रकम उठाइसकिएको समितिले जनाएको छ ।