काठमाडौँ । राष्ट्रिय परिचयपत्र तथा पञ्जीकरण विभागले राष्ट्रिय परिचय व्यवस्थापन सूचना प्रणालीमा देखिएको प्राविधिक गडबडीका कारण देशभर परिचयपत्रसम्बन्धी सेवा रोकिएको जनाएको छ।

विभागले मंगलबार जारी गरेको सूचनामा प्रणाली मर्मतको काम जारी रहेकाले सेवा तत्काल सुचारु हुन नसक्ने स्पष्ट पारेको हो।

गत वैशाख २१ गतेदेखि प्रणालीमा समस्या देखिएपछि नयाँ दर्ता (इनरोलमेन्ट) प्रक्रियामा जारी हुने राष्ट्रिय परिचय नम्बरलाई प्रणालीले प्रमाणीकरण गर्न नसकेको विभागले जनाएको छ। यसअघि वैशाख २३ गते नै समस्या समाधानका लागि मर्मत भइरहेको जानकारी सार्वजनिक गरिएको थियो।

तर हालसम्म प्राविधिक समस्या समाधान नभएकाले सेवा प्रवाह प्रभावित भइरहेको छ।

विभागले देशभरका जिल्ला प्रशासन कार्यालय, इलाका प्रशासन कार्यालय तथा नारायणहिटी दरबार संग्रहालय परिसरस्थित परिचयपत्र इकाइलगायत सबै सेवा केन्द्रलाई पत्राचारमार्फत सेवा अवरुद्ध रहेको जानकारी गराइसकेको छ।

सूचनामा प्रणाली मर्मत कार्य जारी रहेको र मर्मत पूरा नभएसम्म नयाँ दर्ता कार्य सञ्चालन गर्न नसकिने उल्लेख छ। विभागले सेवा पुनः सञ्चालन भएपछि अर्को सूचनामार्फत जानकारी गराइने पनि स्पष्ट पारेको छ।