काठमाडौँ। नेपालको एकमात्र राष्ट्रिय ध्वजावाहक नेपाल वायुसेवा निगमले हिजो असोज ११ गते शनिवारदेखि चीनको ग्वाञ्जाओ शहरमा सिधा उडान सुरु गरेको छ । निगमले काठमाडौँ–ग्वाञ्जाओ–काठमाडौँ नियमित उडान सञ्चालन गरेपछि यसले नेपालको पर्यटन प्रबर्द्धन र व्यापारमा ठुलो सहयोग हुने भएको छ।

निगमले चीनको ग्वाञ्जाओमा असोज ९ गतेदेखि उडान सञ्चालन गर्ने योजना बनाएको भएपनि केही प्राविधिक कमजोरी र तयारी पूरा नभएका कारण निगमको उद्घाटन उडान शनिबार दिउँसो मात्र भएको कार्यकारी अध्यक्ष युवराज अधिकारीले जानकारी दिएका छन ।

ग्वाञ्जाओको उद्घाटन उडानमा सहभागी विभिन्न क्षेत्रका व्यक्ति तथा केही यात्रु त्रिभुवन अन्तरराष्ट्रिय विमानस्थलमा पुगिसकेको अवस्थामा उडान रद्द भएको थियो । विमानस्थल पुगेका यात्रुलाई निगमले होटलमा राखेर व्यवस्थापन गरि भोलीपल्ट उडाएको थियो ।

निगमका प्रवक्ता मनोजकुमार साहले बताए अनुसार काठमाडौँबाट शनिबार दिउँसो ग्वाञ्जाओ उडेको विमान ग्वाञ्जाओबाट एक सय सात यात्रु लिएर आइतबार काठमाडौँ फर्किएको छ ।

पूर्वनिर्धारित तालिका बमोजिम नै अब चीनको ग्वाञ्जाओमा नियमित उडान हुने जनाएको छ । निगमले प्रत्येक साता तीन नियमित उडान गर्ने तालिका बनाएको छ ।

पहिलो उडान असोज १२ गते र त्यसपछि असोज ३०, कात्तिक २ र ६ गते हुने भएको छ । त्यसपश्चात् प्रत्येक आइतबार, मंगलबार र शनिबार ग्वाञ्जाओतर्फ सिधा उडान हुने बताइएको छ । काठमाडौँबाट ग्वाञ्जाओसम्मको एकतर्फी भाडादर ३० हजार र दोहोरो टिकट ५० हजार तोकिएको निगमको व्यापार विभागले जनाएको छ ।

काठमाडौँ–ग्वाञ्जाओ गन्तव्यमा अहिले चीनको वायुसेवा कम्पनी चाइना साउदर्नले नियमित उडान गरिरहेको छ । नेपालबाट हिमालय एयरलाइन्सले यो रूटमा नियमित उडान भर्दै आएको छ ।

नेपाली व्यापारीहरूको बाहुल्यता रहेको ग्वाञ्जाओ उडानले निगमलाई आर्थिक रूपमा लाभ हुनसक्ने अनुमान गरिएको छ । निगमको ग्वाञ्जाओ उडानसँगै नौ देशका ११ गन्तव्यमा नियमित उडान हुने भएको छ ।

हाल नेपाल वायुसेवा निगमसँग रहेका दुईवटा न्यारोबडी र दुईवटा वाइडबडी विमान मार्फत कतारको दोहा, मलेसियाको क्वालालम्पुर, संयुक्त अरब इमिरेट्सको दुवई, हङकङ, भारतका दिल्ली, मुम्बई र बैङ्गलोर, थाइल्याण्डको बैंकक, साउदी अरबको दमाम र जापानको नारिता विमानस्थलमा अन्तरराष्ट्रिय उडान गरिरहेको निगम स्रोतले जनाएको छ ।