काठमाडौं । सूचीकृत अधिकांश वाणिज्य बैंकमध्ये कम पीइ रेसियो भएकाहरुको सेयर भाउ २०० भन्दा तल रहेको छ । कात्तिक २३ गतेको अन्तिम कारोबार मूल्य अनुसार १३ वाणिज्य बैंकहरुको पीइ २० भन्दा तल छ । ८ वटाको उक्त रेसियो १५ भन्दा पनि कम देखिएको छ।

जसमध्ये ६ वटाको बजार भाउ २०० रुपैयाँ भन्दा तल रहेको तथ्यांकले देखाएको छ । प्राइम कमर्सियल बैंकको पीइ रेसियो सबैभन्दा कम छ । यसको उक्त रेसियो ७.९१ र प्रतिकित्ता सेयर मूल्य १८७ रुपैयाँ ९० पैसा मात्र रहेको छ ।

त्यसैगरी, प्रभु बैंकको बजार भाउ १५४ रुपैयाँ र पीइ रेसियो ८.७६ रहेको छ । पछिल्लो समय निरन्तर घट्दो बजारका कारण बैंकहरुको पीइ रेसियो पनि तल आएको देखिन्छ ।

सामान्य भाषामा बुझ्दा कम्पनीको सेयर भाउलाई प्रतिसेयर आम्दानीले भाग गर्दा आउने अनुपात नै पीइ रेसियो हो ।

कुनै कम्पनीको पीइ २० भन्दा कम छ भने त्यसलाई तुलनात्मक रुपमा लगानीका लागि सुरक्षित मानिन्छ । तर पीइ कम छ भन्दैमा लगानी सुरक्षित हुन्छ भन पनि मिल्दैन । पीइ रेसियो भनेको वित्तीय विश्लेषण गर्दा प्रयोग गरिने एउटा महत्वपूर्ण टुल मात्र हो ।

यता, पछिल्लो तथ्यांक अनुसार नेपाल इन्भेष्टमेन्ट मेगाको ९.७६ र एमएमबि बैंकको पीइ रेसियो ९.७८ रहेको छ । जम्मा ४ वटाको उक्त रेसियो १० भन्दा तल छ ।

कृषि विकास बैंकको प्रतिसेयर आम्दानी भने नोक्सानीमा रहेकाले यसको पीइ पनि ऋणात्मक छ । त्यसैगरी, सिद्धार्थ बैंकको पीइ १९४.९६ रहेको छ । नेपाल र लक्ष्मी सनराइज बैंकको पनि उक्त रेसियो अरुको भन्दा धेरै नै छ ।

औसतमा वाणिज्य बैंकको पीइ रेसियो २८.६३ रहेको छ ।के हो पीइ रेसियो रु कम्पनीको बजार भाउलाई प्रतिसेयर आम्दानीले भाग गर्दा आउने अनुपात नै पीइ रेसियो हो ।

पीइ रेसियोले कम्पनी ‘अन्डरभ्यालुड’ वा ‘ओभरभ्यालुड’ के हो भन्ने छुट्याउन मद्दत पुर्याउने भएकाले लगानीमा यसलाई महत्वपूर्ण सूचक मानिन्छ । सामान्यतयः पीइ रेसियो थोरै भएका कम्पनीहरुमा लगानी सुरक्षित मानिन्छ । तर पीइ कम हुँदैमा सधैं सबै कम्पनी राम्रा हुन्छन् भनेर मात्र चाहिँ बुझ्नु हुँदैन ।

अनि, पीई केही बढी हुँदैनमा त्यो कम्पनीमा लगानी गर्नु हुँदैन भन्ने पनि सधैं सोच्नु पनि हुँदैन । यसमा अन्य केही पक्षहरुको पनि भूमिका रहने गर्छ ।

पीइसँगै अन्य सूचकहरु पनि उत्तिकै ध्यान दिनुपर्ने हुन्छ । कम्पनीको ग्रोथ अवस्थालाई पनि ख्याल गर्नुपर्छ। भविष्यको सम्भावनातर्फ पनि ध्यान दिनुपर्छ । स्रोत : नेप्से