काठमाडौं । नेपाल तेक्वान्दो सङ्घको आयोजनामा चौथो माउन्ट एभरेष्ट अन्तर्राष्ट्रिय तेक्वान्दो प्रतियोगिता (डब्लुटी जी वान) तथा दोस्रो माउन्ट एभरेष्ट जिसिएस अन्तर्राष्ट्रिय पुम्से प्रतियोगिता (डब्लुटी जी वान) फागुन १ गतेदेखि हुने भएको छ ।

प्रतियोगितामा २० देशका झन्डै १ हजार ५ सय खेलाडीको सहभागिता रहने आयोजक सङ्घका उपाध्यक्ष भानबहादुर  चन्दले  हिजो काठमाण्डौमा आयोजित पत्रकार सम्मेलनमा जानकारी दिनुभयो । उहाँका अनुसार गेरोगीरपुम्सेतर्फ जम्मा ७४ स्वर्णका लागि प्रतिस्पर्धा हुनेछ ।

प्रतियोगितामा राष्ट्रिय खेलकुद परिषद् (राखेप) ले सञ्चालन गरिरहेको मिसन– २०२६ को विशेष प्रशिक्षणमा रहेका खेलाडी पनि सहभागी हुने सङ्घका सदस्य कुमार लामा घिसिङले बताउनुभयो । प्रतियोगिता सञ्चालन गर्न झन्डै ३ करोड रुपैयाँ खर्च लाग्ने आयोजकले जनाएको छ ।

प्रतियोगितालाई सफलतापूर्वक सम्पन्न गर्न सङ्घका सल्लाहकार परिषद्का अध्यक्ष एवम् तेक्वान्दो सङ्घका पूर्वअध्यक्ष प्रकाशशम्शेर राणाको अध्यक्षतामा मूल आयोजक समिति गठन गरिएको छ भने विभिन्न १३ उपसमिति पनि गठन गरिएका छन् । ६ दिनसम्म चल्ने प्रतियोगिताका खेलहरू काठमण्डौको त्रिपुरेश्वरमा रहेको राखेपको कभर्डहलमा खेलाइने जनाइएको छ ।