आर्थिक सञ्जाल । शुक्रबार, ९ फागुन २०७६
काठमाडौं । सुनको भाउले दिनहुँ नयाँ–नयाँ रेकर्ड बनाउन थालेको छ । यसैक्रममा शुक्रबार सुन तोलामा फेरि ५०० रुपैयाँले बढेर ७८ हजार १०० रुपैयाँ पुगेको छ । यस्तै, तेजावी सुनको भाउ पनि तोलाको ५०० रुपैयाँले नै बढेर ७७ हजार ८०० रुपैयाँ पुगेको छ । शुक्रबार चाँदीको भाउ भने स्थिर रहेको छ । चाँदी तोलाको ९ सय १५ रुपैयाँमा कारोबार भइरहेको नेपाल सुन–चाँदी व्यवसायी महासंघले जनाएको छ ।                                                                                                              अन्तर्राष्ट्रिय बजारमा भाउ चुलिएपछि त्यसको सीधा प्रभाव नेपाली बजारमा पनि परेको हो । विदेशमा हुने भाउ घटबढ अनुसार नै यहाँ पनि मूल्य निर्धारण गरिन्छ । पछिल्लो समय सुनको मूल्य चुलिनुमा कोरोना भाइरसलाई कारण देखाइएको छ ।
यस भाइरसका कारण विश्व अर्थतन्त्र प्रभावित भइरहँदा सुरक्षित क्षेत्र खोज्दै लगानी कर्ता सुन तर्फ आकर्षित भएका हुन् ।  यस्तै, चीन–अमेरिका विवाद अझै पूर्णरुपमा समाधान भइनसकेको, अमेरिका र इरानबीचको बढ्दो विवाद लगायतका कारण सुनको भाउ उकालो लागेको व्यवसायीहरु बताउँछन् ।