काठमाडौँ । एनसेलले बाढी प्रभावित क्षेत्रमा सञ्चार, खोज तथा उद्धार र राहत वितरणलाई सहज बनाउन उपलब्ध गराउँदै आएको निःशुल्क भ्वाइस, डेटा तथा एसएमएस सेवा थप सात दिन बढाएको छ ।

कम्पनीका अनुसार थपिएको सेवा शनिबारदेखि लागू हुनेछ । यससँगै प्रभावित क्षेत्रमा थप एक सातासम्म एनसेलका ग्राहकले उक्त सेवा निःशुल्क प्रयोग गर्न सक्नेछन् ।

यसअघि बुधबार एनसेलले रसुवाको भोटेकोशी नदीमा आएको भीषण बाढी प्रभावित क्षेत्रमा तीन दिनसम्म निःशुल्क डेटा, अननेट भ्वाइस र १०० वटा एसएमएस उपलब्ध गराउने घोषणा गरेको थियो । उक्त तीनदिने अवधि शुक्रबार सकिँदै छ ।

विपद्का बेला सूचना आदानप्रदान, आपसी समन्वय तथा खोज, उद्धार र राहत कार्यलाई प्रभावकारी बनाउन सञ्चार सेवाको महत्वपूर्ण भूमिका रहने भन्दै कम्पनीले निःशुल्क सेवाको अवधि थप गरेको जनाएको छ ।

एनसेलका चीफ कन्जुमर बिजनेस अफिसर उपाङ्ग दत्ताले प्रभावित समुदायलाई परिवार तथा आफन्तसँग सम्पर्कमा रहन र उद्धार तथा राहतमा खटिएका टोलीलाई आवश्यक समन्वय गर्न सहज होस् भन्ने उद्देश्यले सेवा थप गरिएको बताए ।

१८ वटा मोबाइल टावर पुनः सञ्चालन

एनसेलले बाढीका कारण प्रभावित क्षेत्रमा अवरुद्ध भएका १८ वटा मोबाइल टावर पुनः सञ्चालनमा ल्याएको जनाएको छ । थप ९ वटा प्रभावित टावर पुनः सञ्चालनका लागि काम भइरहेको कम्पनीले जनाएको छ ।

यसैगरी, एनसेलले खोज, उद्धार, राहत तथा पुनःस्थापना कार्यमा सहयोग पुर्‍याउने उद्देश्यले बिहीबार प्रधानमन्त्री दैवी प्रकोप उद्धार कोषमा एनसेल फाउन्डेसनमार्फत १ करोड रुपैयाँ सहयोग गरेको थियो ।

कम्पनीले बाढी प्रभावित क्षेत्रका नागरिकलाई सुरक्षित रहन सम्बन्धित निकायले जारी गरेका सुरक्षा निर्देशन पालना गर्न आग्रह गर्दै एसएमएस तथा सामाजिक सञ्जालमार्फत आवश्यक सूचनासमेत प्रवाह गरिरहेको जनाएको छ ।