काठमाडौं–लिपमोटरको नेपालका लागि आधिकारिक वितरक सांग्रिला मोटर्स प्रालिले आफ्नो चर्चित इलेक्ट्रिक एसयूभी लिपमोटर सी१० को २०२६ मोडलका लागि विशेष अफर मूल्य सार्वजनिक गरेको छ ।

कम्पनीका अनुसार यो विशेष अफर अवधिमा गाडीको मूल्य ७५ लाख ९९ हजार रुपैयाँ कायम गरिएको छ, भने अफर समाप्त भएपछि यसको नियमित मूल्य ७७ लाख ९९ हजार रुपैयाँ पुग्नेछ ।

नेपालमा लिपमोटरको सबैभन्दा बढी बिक्री हुने र रुचाइएको मानिने यो मोडलको नयाँ २०२६ संस्करणमा स्मार्ट कनेक्टिभिटी सुविधाहरू थपिएका छन् । अब ग्राहकहरूले गाडीको आधिकारिक लिपमोटर एपका साथै एप्पल कारप्ले र एन्ड्रोइड अटोको सहज अनुभव लिन सक्नेछन् ।

उच्च सुरक्षा र फराकिलो क्याबिन स्पेस प्रदान गर्न सेल–टु–चेसिस प्रविधिमा निर्माण गरिएको यस एसयूभीमा १६० किलोवाटको इलेक्ट्रिक रियर व्हील ड्राइभ मोटर जडान गरिएको छ । यसले एक पटकको पूर्ण चार्जमा ५३० किमी (सीएलटीसी) सम्मको रेन्ज प्रदान गर्ने दाबी गरिएको छ ।

अत्याधुनिक इन्टेरियर डिजाइनसहित आएको सी१० मा १४.६ इन्चको सेन्ट्रल टचस्क्रिन, १०.२५ इन्चको डिजिटल ड्राइभर डिस्प्ले, २.१ वर्ग मिटरको प्यानोरमिक ग्लास रूफ, लेभल–२ एडास फिचर र आरामदायक  प्रिमियम लेदरेट सिटहरू उपलब्ध छन् । यस कारको ग्राउन्ड क्लिरेयन्स १९० एमएम छ ।