नाइमा नेपाल मोबिलिटी एक्स्पोमा हंसराज हुलासचन्द एण्ड कम्पनीले ६ लाख ४९ हजार रुपैयाँ मूल्य तोकेर नयाँ ट्रायम्फ स्पिड टी४ मोटरसाइकल सार्वजनिक गरेको छ । यससँगै कम्पनीले नेपाली बजारमा आफ्नो मोडर्न क्लासिक मोटरसाइकल लाइनअपलाई थप विस्तार गरेको छ ।

नेपाली बजारमा ट्रायम्फको स्पिड ४००, स्क्र्याम्बलर ४०० एक्स र स्क्र्याम्बलर ४०० एक्ससीसँगै अब स्पिड टी४ पनि उपलब्ध भएको छ ।

यो नयाँ मोडललाई स्पिड ४०० को तुलनामा थप सस्तो विकल्पको रूपमा प्रस्तुत गरिएको छ । मूल्य कम भए तापनि यसमा नियो रेट्रो रोडस्टर डिजाइन र मुख्य मेकानिकल विशेषताहरूलाई कायमै राखिएको छ ।

इन्जिनको कुरा गर्दा, स्पिड टी४ मा ३५० सीसीको लिक्विड कुल्ड, सिंगल–सिलिन्डर इन्जिन जडान गरिएको छ । यस इन्जिनले ७,५०० आरपीएममा २८.६ बीएचपी पावर र ५,५०० आरपीएममा ३१ एनएम टर्क जेनेरेट गर्दछ ।

६ स्पिड गियरबक्ससँग जोडिएको यो इन्जिन दैनिक प्रयोग र उत्कृष्ट कार्यसम्पादनको सन्तुलन मिलाउनका लागि डिजाइन गरिएको हो ।

स्पिड टी४ ले स्पिड ४०० कै समग्र बनावटलाई पछ्याएको छ । यसका दुवै तर्फ १७ इन्चका एलोय ह्विलहरू रहेका छन् भने ब्रेकिङका लागि अगाडि ३०० एमएम र पछाडि २३० एमएमको डिस्क ब्रेकका साथै ड्युअल च्यानल एबीएस प्रविधि दिइएको छ ।

यद्यपि, स्पिड ४०० मा प्रयोग गरिएको इन्भर्टेड फ्रन्ट फर्कको साटो टी४ मा परम्परागत टेलिस्कोपिक फ्रन्ट फर्कको प्रयोग गरिएको छ ।