टीभीएसले भारतीय टु ह्विलर बजारमा नयाँ १६० सीसीको म्याक्सी स्कुटर विकास गरिरहेको छ। रिपोर्टका अनुसार कम्पनीले आउँदो नयाँ वर्षमा साे स्कुटर पेश गर्ने योजना बनाएको छ। सो मोडल सम्भवत: कम्पनीको अहिलेसम्मकै सबैभन्दा पावरफुल स्कुटर बन्नेछ ।

डिजाइनका हिसाबले यसमा एनटर्क सिरिजको पहिचान झल्किने भए पनि थप प्रिमियम र आकर्षक म्याक्सी स्कुटर शैली अपनाइने अपेक्षा गरिएको छ। सो स्कुटर लन्च पछि भारतीय प्रिमियम म्याक्सी स्कुटर सेगमेन्टमा यामाहा एरोक्स १५५, हिरो जुम १६० तथा नयाँ होन्डा एडीभी १६० र यामाहा एनम्याक्स १५५ जस्ता मोडलसँग प्रतिस्पर्धा गर्नेछ।

नयाँ स्कुटरमा करिब १६० सीसी क्षमताको लिक्विड-कुल्ड, सिंगल-सिलिन्डर इन्जिन प्रयोग गरिने अपेक्षा गरिएको छ। कम्पनीले हालसम्म इन्जिनको आधिकारिक विवरण सार्वजनिक नगरे पनि सो इन्जिनले १५ देखि १८ हर्सपावर र १४ देखि १६ एनएमको टर्क उत्पादन गर्ने अनुमान गरिएको छ। सो इन्जिन सीभीटी अटोमेटिक ट्रान्समिसनसँग जोडिने बताइएको छ।

नयाँ स्कुटरमा फुल्ली डिजिटल टीएफटी इन्स्ट्रयुमेन्ट क्लस्टर, ब्लुटुथ कनेक्टिभिटी, टर्न-बाइ-टर्न नेभिगेसन, कल र म्यासेज अलर्ट, राइडिङ स्टेटिस्टिक्स र मल्टिपल राइडिङ मोड उपलब्ध हुनेछ । साथै ट्र्याक्सन कन्ट्रोल, ड्युअल च्यानल एबीएस र स्मार्ट की सिस्टमजस्ता प्रिमियम सुविधाहरू पनि समावेश गरिन सक्ने अनुमान गरिएको छ। साथै स्कुटरमा ठुलो बडीवर्क, फराकिलो फ्रन्ट एप्रन, स्टेप गरिएको सिट, अग्लो विन्डस्क्रिन र आरामदायी राइडिङ पोजिसन उपलब्ध हुने सम्भावना छ।

यसमा ठुला आकारका पाङ्ग्रा, बलियो चेसिस, फ्रन्ट टेलिस्कोपिक फोर्क र पछाडि ट्विन शर्क एब्जर्बर वा मोनोशक सस्पेन्सन सिस्टम उपलब्ध हुनेछ । दुबै पाङ्ग्रामा डिस्क ब्रेक प्रयोग गरिने अपेक्षा गरिएको छ। त्यस्तै सिटमुनि ठुलो स्टोरेज क्षमता, यूएसबी चार्जिङ पोर्ट, फराकिलो फ्लोरबोर्ड र आरामदायी सिट उपलब्ध गराउनेछ ।

नयाँ १६० सीसी म्याक्सी स्कुटरको सुरुआती मूल्य करिब १ लाख ४० हजारदेखि १ लाख ५० हजार भारु बीच हुने अनुमान गरिएको छ।