काठमाडौं । मुक्तिनाथ विकास बैंकको ऋणपत्रमा आवेदन दिने साउन १२ गते मंगलबार अन्तिम दिन हो । मंगलबार कार्यालय समयसम्म यस ऋणपत्रमा आवेदन दिन सकिन्छ ।

बैंकले साउन ७ गतेदेखि १ अर्ब २५ करोड रुपैयाँ बराबरको १२ लाख ५० कित्ता ऋणपत्र बिक्रीमा ल्याएको हो । यसमध्ये ५ लाख इकाई सर्वसाधारणका लागि खुला गरिएको छ ।

बाँकी ७ लाख ५० हजार इकाई भने बैंकले आफ्नै पहलमा अन्य संघ–संस्थालाई बिक्री गर्नेछ । यस ऋणपत्रमा वार्षिक ८.७५% ब्याजदर पाइनेछ । बैंकले ७ वर्ष अवधिको मुक्तिनाथ विकास बैंक डिबेन्चर जारी गरेको हो ।

यसमा बिक्री प्रबन्धकको काम सानिमा क्यापिटल मार्केटले गरेको छ। यसमा न्यूनतम २५ कित्तादेखि अधिकतम ५ लाख कित्तासम्म आवेदन दिन सकिन्छ ।

यस ऋणपत्रमा सी–आस्वा, मेरो सेयर तथा तोकिएको बैंक तथा वित्तीय संस्थाको शाखा कार्यालयबाट आवेदन दिन सकिनेछ ।

बैंकको ऋणपत्रलाई केयर रेटिङ नेपालले केयर एनपी बीबीबी आइएस रेटिङ दिएको छ । यसले कम्पनीको वित्तीय दायित्व बहन गर्ने क्षमतामा मध्यम जोखिम रहेको भन्ने जनाउँछ ।