२८ बैशाख २०७८, मंगलवार

दशैं अघि नै सानिमा जनरलको आईपिओ बाँडफाँड हुने

आर्थिक सञ्जाल
२६ आश्विन २०७७, सोमबार १६:१०

काठमाडौं । सानिमा जनरल इन्स्योरेन्सको आईपिओ दशैं अघि नै बाँडफाँड सम्पन्न गर्ने गरी काम भइरहेको बिक्री प्रबन्धक एनआईसी एसिया क्यापिटलले जनाएको छ ।

सानिमा जनरल इन्स्योरेन्सले निष्काशन गरेको ३० लाख कित्ता आईपिओमा झण्डै नौ लाख जनाको आवेदन परेको छ । यद्यपि बैंकहरुबाट अन्तिम प्रमाणिकरण हुन बाँकी रहेकोले औपचारिक तथ्याङ्क भने आउन बाँकी छ ।

सानिमा लाईफले निष्काशन गरेको आईपिओको बिक्री प्रबन्धक एनआईसी एसिया क्यापिटलका सिईओ रामेन्द्र रायमाझीले दशैं अघिसम्म आईपिओ बाँडफाँड गरिसक्ने गरी काम भइरहेको बताए ।

रायमाझीले बैंकबाट अन्तिम तथ्याङ्क आउन बाँकी रहेको तथा नियामिक निकायबाट अनुमति लिनुपर्ने लगायतका कामहरु बाँकी रहेको तर तीव्र गतिमा काम भइरहेकोले दशैं अघि बाँडफाँड सम्पन्न हुने जनाए ।

एनआईसी एसिया क्यापिटलले सकेसम्म चाँडै आईपिओ बाँडफाँड गर्न प्रयत्न गरिने जनाएको छ । कम्पनीका अनुसार दोहोरो परेकाहरुको आवेदन छनौट गरी अन्तिम सूचि तयार भएपछि आईपिओ बाँडफाँड गरिने छ ।

गोला प्रथाबाट बाँडफाँड गरी दुई लाख ७३ हजार जनालाई १० कित्ताको दरले शेयर वितरण हुनेछ भने करिब साढे छ लाख आवेदकको हात रित्तो हुनेछ ।