६ बैशाख २०७८, सोमबार

सरकार ढाल्न भारतीय चलखेल

आर्थिक सञ्जाल
१७ बैशाख २०७७, बुधबार १६:४६
आर्थिक सञ्जाल २०७७ वैशाख १७ गते बुधबार
काठमाडौं । नेकपाका आदरणीय अध्यक्ष केपी शर्मा ओली प्रधानमन्त्री रहेको सरकार गिराउन र मुलुकमा अस्थिरता सिर्जना गर्न सहयोग पुग्नेगरी सोही पार्टीका अर्का अध्यक्ष पुष्पकमल दाहालले भारतीय प्रधानमन्त्री नरेन्द्र मोदीका धेरैजना स्वकीय सचिवहरु र सहयोगीहरु मध्येका एक जनालाई गत चैत ४ गते भेटेका छन् ।
सोही दिनको उडानबाट नेपाल भित्रिएका उनी भारतीय गुप्तचर संस्था ̔र (Research and Analysis Wing-RAW) का पूर्व अधिकृत हुन, जो मोदी भारतीय प्रम बन्नुअघि नै ̔र को जागिर छाडी भारतीय जनता पार्टीका भातृ संगठनमा आबद्ध भएका थिए ।
पूर्व प्रम स्वर्गीय सूर्यबहादुर थापाका छोरा  सुनिल थापा र नेपाली कांग्रेसका आदरणीय उपसभापति विमलेन्द्र निधीले सहजकर्ताको भूमिका निर्वाह गरी ती भारतीयलाई प्रचण्डसम्म पुर्याएका थिए ।
कट्टर हिन्दुवादी ती पूर्व ̔र अधिकारी मूलत सत्ताधारी नेकपामा ल्याउन लागिएको आँधिबेहरीमा नेकपाकै वरिष्ठ नेता तथा पूर्व प्रधानमन्त्री माधव कुमार नेपालको भूमिका कस्तो हुन्छ भनी जान्न र सरकारका विरुद्ध वातावरण निर्माण गर्ने क्रममा ̔अन्य सहयोग पुर्याउन नेपाल आएका हुन् ।
उनले पटक–पटक कम्युनिष्ट पार्टीको सरकारका विरुद्ध अर्का अध्यक्ष प्रचण्डको योजना, मधेशवादी दल र नेपाली कांग्रेसको भरथेग र नेपालमा सधैं अस्थिरता चाहने एकथरी भारतीय संस्थापनको आर्थिक तथा अन्य सहयोगमा ल्याइने अविश्वासको प्रस्तावप्रति माधवको भूमिका कस्तो हुनेछ भनी जान्न चाहेका थिए ।
सो अवसरमा प्रभावकारी र बढी क्लिक हुने पत्रिका तथा अनलाइनहरुका सम्बन्धमा पनि चर्चा भएको र लगत्तै ती भारतीयले नेपालका चलेका दुई दैनिकका सम्पादकलाई पनि भेटेका थिए । नेपालका सरकार बनाउन र गिराउन भारतीयको भूमिका केही वर्षअघि सम्म प्रत्यक्ष र सहजै पुष्टि हुनेगरी देखिन्थे ।
तर केही समय यता प्रत्यक्ष र देखिने गरी हस्तक्षेप भएको महशुस भएको थिएन । अब फेरी दुई तिहाईको सरकार बनाउने कम्युनिष्ट पार्टीका एक अध्यक्षकै संलग्नतामा भारतीयको भूमिकालाई प्रभावकारी बनाउन खोजिएको यस घटनाले पुष्टि गरेको छ । स्मरणीय यो छ कि, नेपाल भारतबीचको सीमाक्षेत्रमा प्रम ओली र गृहमन्त्री रामबहादुर थापाको सक्रीयतामा कोरोनाका बहानामा दर्जनौं सशस्त्र प्रहरी क्याम्प राखिएपछि भारतीय सत्तासिन र कुलिनहरुलाई नपचेको कुरा त चर्चामा आएकै हुन् ।
भारतले नेपाली सीमा मिचेर नेपाली भूभाग कब्जा मात्र गरेको छैन साँझसम्म नेपालीका नाममा भएका घर जग्गा रातारात मिचेर उतातिर पारेका छन् । यस्ता मिचाहा प्रवृत्तिको विरोध गर्दा कतिपय सीमाक्षेत्रका नेपालीलाई भारतीय सीमा सुरक्षा बलले गोली ठोकेर हत्या गरेका उदाहरण थुप्रै रहेका छन् ।
यस्तो अवस्थामा नेपालको सीमा जोगाउन तथा राष्ट्र र राष्ट्रियताको संरक्षण गर्न दूरदृष्टि राखी समयमै सीमा क्षेत्रमा सुरक्षा बलको उपस्थिति बढाउने कार्यलाई सहयोग पुर्याउनु पर्ने हो कि विदेशीसँग गोप्य कोठे बैठक बसी सरकार गिराउन लाग्नुपर्ने हो ? केही गरी यो सरकार हटिहाल्यो र नयाँ सरकार बन्यो भने सरकारको नेतृत्व गर्न हौसिने र हौसाउने हरुले हामी नेपाली र नेपालको हितका खातिर सीमा क्षेत्रमा खटाइएका सशस्त्र प्रहरी बललाई कुनैपनि हालतमा फिर्ता गराउँदैनौं भनी सार्वजनिक घोषणा गर्न सक्लान् ?
नाकाबन्दीताका भारतीयलाई सहयोग गरी नाका बन्द गर्न जाने पार्टीका नेताहरु त कुनैपनि हालतमा केपी–बादलले सीमामा तैनाथ गरेका सुरक्षा दस्तालाई त्यहाँबाट हटाएर स्वामीभक्ती प्रस्तुत गर्न चाहन्छन् नै, कम्युनिष्ट पार्टीका नेताहरुको लाइन पनि त्यही हो कि भनी जनतामा शंका भने उब्जाउनु हुन्न । उमेश दाहालबाट