८ बैशाख २०७८, बुधबार

कोरोनाबाट मृत्यु हुनेको संख्या अमेरिकामा मात्रै ५० हजार नाघ्यो 

आर्थिक सञ्जाल
१२ बैशाख २०७७, शुक्रबार १७:३४

आर्थिक सञ्जाल २०७७ वैशाख १२ गते शुक्रबार

 

गणेश थापा

क्यालिफोर्निया, २४ अप्रिल । अमेरिकामा नोवल कोरोना भाइरसको संक्रमणबाट मृत्यु हुनेको संख्या ५० हजार नाघेको छ । संक्रमितको संख्यामा समेत उलेख्य मात्रामा बृद्धि भएको छ ।

विगत २४ घण्टाको अवधिमा २ हजार ८ सय बढीले ज्यान गुमाएका छन् । अफिसियल डाटाअपडेट गर्दैआइरहेको न्युजब्रेकका अनुसार कोभिड-१९ को संक्रमणका कारण हिजो मात्रै संयुक्त राज्य अमेरिकामा करिव २६०० जनाको मृत्यु भएको थियो ।

अमेरिकामा अहिलेसम्म ८ लाख ९१ हजार मानिस संक्रमित भएका छन् भने यस अवधिमा कोरोना भाइरसको संक्रमणबाट कूल ५० हजार ८८ जना व्यक्तिको ज्यान गएको छ । क्यालिफोर्नियाको स्थानीय समय अनुसार शुक्रबार विहान ४:४५ बजेसम्म प्राप्त अपडेट अनुसार कोरोना भाइरसको संक्रमणबाट अमेरिकाको न्युयोर्कमा सवैभन्दा बढीको ज्यान गएको छ ।

न्यूयोर्कमा २१ हजार मानिसको मृत्यु भइसकेको छ । त्यहॉ संक्रमित हुनेको संख्या पुरै अमेरिकामै सवैभन्दा बढी २ लाख ७१ हजार रहेको छ । यता क्यालिफोर्नियामा पनि मृतको संख्या १५३३ नाघेको छ भने झण्डै ४० हजार मानिसमा संक्रमण देखिएको छ । दिनहुँ २ हजार ५ सयको हाराहारीमा मानिसहरूको मृत्यु भइरहेको अमेरिकामा यसअघि हप्तादिन पहिले सवैभन्दा बढी करीव ४६०० जनाको कोरोना भाइरसको संक्रमणका कारण ज्यान गएको थियो ।

कोरोना भाइरसको संक्रमण असामान्य बन्दै गएको विश्वको सुपरपावर अमेरिकामा गएको २४ घण्टामा मात्रै झण्डै ३५ हजार व्यक्तिमा कोरोना संक्रमण देखिएको छ ।

दैनिकजसो ३० हजारमाथि नयॉ विरामीहरू थपिरहेका छन् । स्वास्थ्य क्षेत्रका विशेषज्ञहरूले अमेरिकामा कोभिड-१९ को संक्रमणका २ लाख बढीको मृत्यु हुन सक्ने तथा यसबाट दसौं लाख मानिसमा संक्रमण फैलिन सक्ने चेतावनी दिदै आएका छन् ।

कोरोना भाइरसको संक्रमण फैलिएयता अमेरिकामा १० जना नेपालीको मृत्यु भएको छ भने संक्रमित हुने नेपालीको संख्या सयौं छ । अमेरिकाका ५० वटै राज्यमा फैलिएको कोरोनाबाट सवैभन्दा प्रभावित न्युयोर्कमा नेपालीहरूको बाक्लो बसोबास रहेको छ ।

कोरोनाको महामारीबाट त्यहॉ सवैभन्दा बढी नेपाली प्रभावित भएको बताइएको छ । प्रवासमा रहेका नेपालीहरू मध्ये संक्रमितको संख्या अमेरिकामा सवैभन्दा बढी रहेको छ । यहॉ संक्रमित संख्या ७ सय बढी पुगेको विभिन्न सामाजिक संघसंस्थाहरूले उल्लेख गरेका छन् ।       विश्वको सर्वशक्तिमान राष्ट्र संयुक्त राज्य अमेरिका यतिवेला भने कोभिड-१९ संगको आन्तरिक लडाइमा कडा संघर्षरत छ । कोरोना भाइरस नियन्त्रणका लागि निकै लामो समय लाग्नसक्ने विज्ञहरूले बताउदै आएका छन् ।

यसैबीच कोभिड-१९ को महामारीबाट प्रभावित साना व्यापार व्यावसाय तथा अस्पताल लगायत स्वास्थ्य क्षेत्रलाई सहयोग गर्न ल्याइएको ४८० बिलियनको राहत प्याकेज विहिबार अमेरिकाको दुवै सदनबाट पारित भएको छ । उता ग्रिन कार्ड, डिभि लगायत केही इमिग्रेसन सम्बन्धीका कामकारवाहीहरू भने केही समयका लागि अस्थायी रूपमा सरकारले स्थगित गरेको छ ।