२१ फाल्गुन २०७७, शुक्रबार

लक डाउनमा बैंकको विद्युतीय कारोबारमा दोब्बर वृद्धि

आर्थिक सञ्जाल
२८ चैत्र २०७६, शुक्रबार १०:३८

आर्थिक सञ्जाल चैत्र २८, २०७६ शुक्रबार

काठमाडौँ । लक डाउनको समयमा विद्युतीय कारोवार गर्नेक्रम बढेको छ । नेपाल क्लियरिङ हाउस लिमिटेडका अनुसार लक डाउनको दोस्रो सातामा ३५ अर्ब ६० करोड रुपैयाँ बराबरको विद्युतीय कारोबार फछ्र्योट भएको छ ।

जबकी पहिलो सातामा मात्रै १८ अर्ब ६० करोड बराबरको कारोबारको फछ्र्योट गरिएको थियो । पहिलो साताको तुलनामा झण्डै दोब्बरले विद्युतीय कारोवारको फछ्र्यौट गरिएको हो ।

क्लियरिङ हाउसले हाल एनएचसीएल–इसीसी, एनसीएचएल–आइपीएस, कनेक्ट आइपीएस, कनेक्ट आरटीजीएस र एनपीआइ गरी ५ वटा राष्ट्रिय भुक्तानी प्रणाली सञ्चालन गर्दै आएको छ । त्यसमा नेपाल राष्ट्र बैंक लगायत प्रायः सबै बैंक वित्तीय संस्था आबद्ध छन् ।

सञ्चालनमा रहेका प्रणाली मध्ये इलेक्ट्रोनिक चेक क्लियरिङ (एनसीएचएल–इसीसी) र अन्तर बैंक भुक्तानी प्रणाली (एनसीएचएल–आइपीएस) मा आजदेखि लक डाउनपूर्वको अवस्थाबमोजिमको समयसम्म क्लियरिङ गर्ने व्यवस्था गरिएको छ ।
एनएचसीएल–इसीसीको नियमितरुपमा दिउँसो १ बजेर ३० मिनेटसम्म जम्मा गरिएका चेक र एनसीएचएल–आइपीएसमा दिउँसो १ः०० बजेसम्म प्राप्त भएका भुक्तानी आदेश सोही दिनमा फछ्र्यौट हुने व्यवस्था गरिएको छ ।
सो समय सीमापछि प्रणालीमा आएका कारोबार अर्को दिनमा फछ्र्यौट हुने व्यवस्था रहेको छ । एनसीएचएलको कनेक्ट आइपीएसबाट भने साबिक बमोजिम चौबिसै घण्टा यसको मोबाइल एप्स, वेबसाइट अथवा बैंक वित्तीय संस्थाका मोबाइल र इन्टरनेट बैंकिङबाट कारोबार गर्न सकिनेछ ।  रासस