२३ फाल्गुन २०७७, आईतवार

नेपाल उद्योग वाणिज्य महासंघले कोरोना उपचार कोषमा ५० लाख सहयोग गर्यो

आर्थिक सञ्जाल
१६ चैत्र २०७६, आईतवार २०:१२

आर्थिक सञ्जाल चैत्र १६, २०७६ आइतबार

काठमाडौँ । नेपाल उद्योग वाणिज्य महासङ्घले सरकारले स्थापना गरेको कोरोना भाइरस सक्रमण रोकथाम, नियन्त्रण तथा उपचार कोषमा रु ५० लाख सहयोग उपलब्ध गराएको छ ।

नेपाल उद्योग वाणिज्य महासङ्घका अध्यक्ष भवानी राणाको नेतृत्वमा गएको टोलीले ५० लाख नगद र करिब ७० लाख बराबरको खाद्य सामग्री तथा अन्य औषधी र औषधीजन्य सामग्री उपलब्ध गराएको छ ।

खाद्य तथा दैनिक उपभोग्य बस्तु भने लकडाउनका कारण समस्यामा परेका दैनिक ज्यालादारी तथा श्रमिक वर्गलाई उपलब्ध गराउनेछ । महासङ्घले विपद्को समयमा सानो सहयोगले पनि ठूलो राहत दिने लक्ष्यका साथ महासङ्घका पदाधिकारीसहितको टोलीले सहयोग रकम उपलब्ध गराएको अध्यक्ष राणाले जानकारी दिइन् ।

आइतबार सिंहदरबारमा उपप्रधान तथा रक्षामन्त्री इश्वर पोखरेललाई भेटेर महासंघ अध्यक्ष भवानी राणाले ५० लाख रुपैयाँ बराबरको चेक हस्तान्तरण गरेको बताइन् । अध्यक्ष राणाले महासंघले ५० लाख नगद सँगै डेढ करोड रुपैयाँ बराबरको मेडिकल सामाग्री र खाद्यान्न सहयोग गर्ने बताइन् । महासंघले यस अघि सरकारलाई १० हजार थान मास्क र २ सय ५० सेट व्यक्तिगत सुरक्षा उपकरण पिपिई हस्तान्तरण गरेकाे थियाे ।

सो अवसरमा महासङ्घका वरिष्ठ उपाध्यक्ष शेखर गोल्छा, उपाध्यक्ष चन्द्रप्रसाद ढकाल, पूर्वअध्यक्ष पशुपति मुरारका , उपाध्यक्षहरु चन्द्र ढकाल, किशोर प्रधान र उमेशलाल श्रेष्ठ लगायत अन्य पदाधिकारीहरुको समेत उपस्थित रहेको थिए ।