८ बैशाख २०७८, बुधबार

सेयर कारोबारमा फेरि पनि रेकर्ड ब्रेक

आर्थिक सञ्जाल
१८ फाल्गुन २०७६, आईतवार १७:२४
आर्थिक सञ्जाल आइतबार, १८ फागुन २०७६
काठमाडौं ।  नाफा बुक गर्नेहरु सक्रिय हुँदा आइतबार सेयर बजार सूचक घटे पनि खरिद बिक्री रकमले भने पुनः नयाँ रेकर्ड कायम गरेको छ । छोटो समय नेप्से बेस्सरी बढेको थियो । सोही क्रममा नाफा बुक गर्नेहरु सक्रिय हुँदा बजारमा करेक्सन आएको लगानीकर्ताहरु बताउँछन् । बजार घट्दा पनि अहिलेसम्मकै उच्च कारोबार भएर नेप्सेले सकारात्मक सन्देश दिएको छ । अल्पकालमा सूचक तलमाथि भइरहे पनि यसले बजारको आगामी भविष्य सकारात्मक र सुखद् हुने सन्देश दिएको छ ।
यस अघि बिहीबार ४ अर्ब ४६ करोड रुपैयाँभन्दा धेरैको कारोबार हुँदा त्यस अघिका रेकर्ड ब्रेक भएका थिए । आइतबार बजारमा त्यो रेकर्ड पनि तोडिएको हो । यस दिन ४ अर्ब ८४ करोड रुपैयाँभन्दा बढीको कारोबार भएको हो । बजार करेक्सन भए पनि कारोबार रकमले नयाँ–नयाँ उचाईं लिंदै जाँदा आम लगानीकर्तालाई निकै उत्साहित भएका छन् ।  सेयर बजारमा आम लगानीकर्ताको मनोविज्ञान सबैभन्दा बढी महत्वपूर्ण हुन्छ । सेयर बजार सुधारका लागि सरकारले पनि काम गरिरहेको छ ।
नीतिगत, प्राविधिक तथा मनोवैज्ञानिक हिसाबले समेत बजारमा सकारात्मक प्रभाव पार्ने कामहरु भइरहेका छन् । ब्रोकरहरुका अनुसार यतिबेला बजारमा अल्पकालीन, मध्यकालीन र दीर्घकालीन तीनै किसिमका लगानीकर्ता हावी भइरहेका छन् । अल्पकालीन खरिद बिक्रीकर्ताले दैनिक कारोबारलाई नयाँ उचाईमा पुर्याउन सहयोग पुर्याइरहेका हुन्छन् भने मध्यकालीन र दीर्घकालीन लगानीकर्ताले पनि होल्ड गर्ने हिसाबले सेयर खरिद गरिरहेका फ्रन्टलाइनमा बसेर काम गर्ने ब्रोकरहरु बताउँछन् ।
बजार एकोहोरो हिसाबले बढ्ने वा घट्ने मात्र गर्दैन । वित्तीय सूचकहरु अध्ययन गर्दै अघि बढ्नु पर्छ । कम्पनीको वित्तीय क्षमता, नाफा, प्रतिसेयर आम्दानी, मूल्य–आम्दानी लगायतका सूचकहरुलाई पनि ध्यान दिनुपर्छ । यस दिन नेप्से सूचक ४०.८२ अंकले घटेर १५९१.३६ विन्दुमा अडिएको छ । १८३ कम्पनीको १ करोड २५ लाख १७ हजार २ सय १७ कित्ता सेयर कारोबार भएको छ ।
यस दिन फाइनान्स बाहेक बाँकी सबै समूहका सचक तल झरेका छन् । सबैभन्दा धेरै  जीवन बिमा समूहको सूचक ४७४.६१ अंकले घटेको छ । वाणिज्य बैंक समूहमा पनि २५.२४ अंकको ह्रास देखिएको छ । खरिद बिक्रीमा एनएमबि बैंकको सर्वाधिक २६ करोड ६३ लाख रुपैयाँको कारोबार भएको छ । यस दिन मितेरी डेभलपमेन्ट र मञ्जुश्री फाइनान्सको भाउ सर्किट बढेर सर्किट लागेको छ । सबैभन्दा धेरै बोटलर्स नेपाल तराईका लगानीकर्ताले १०% का दरले गुमाएका छन् ।