२४ फाल्गुन २०७७, सोमबार

महाधिवेशन घोषणापछि बल्ल देउवाले गठन गरे विभागहरु

आर्थिक सञ्जाल
१८ फाल्गुन २०७६, आईतवार ०८:२५

आर्थिक सञ्जाल आइतबार, १८ फागुन २०७६

काठमाडौं । महाधिवेशनको मिति तय भएपछि कांग्रेस सभापति शेरबहादुर देउवाले पार्टीका १३ विभागहरु गठन गरेका छन् । सभापति भएको यति समयसम्म विभाग गठन गर्न आनाकानी गर्दै आएका उनले एकलौटीरुपमा पार्टीका १३ विभाग गठन गरेका हुन् ।

पार्टीभित्रको रामचन्द्र पौडेल समूहले विभागमा बस्‍ने नेताहरुको नाम नदिए पनि रामचन्द्र पौडेल समूहका दुई जना गोविन्द भट्टराई र शिवप्रसाद हुमागाईंलाई विना सहमति संयोजक बनाइएको छ । बाँकी ११ विभागमा आफ्‍नो समूहका नेतालाई देउवाले संयोजक बनाएका छन् ।

विभागहरु गठन गर्ने काम महाधिवेशन सम्पन्न भएलगत्तै गर्नुपर्ने थियो । देउवाले पूर्वउपसभापति गोपालमान श्रेष्ठलाई संगठन विभाग, रमेश रिजाललाई संघीय मामिला तथा प्रदेश समन्वय विभाग, फरमूल्लाह मन्सुरलाई मुस्लिम विभाग, अर्जुनप्रसाद जोशीलाई स्थानीय तह समन्वय विभागको संयोजक तोकेका छन् ।
त्यस्तै, आनन्दप्रसाद ढुंगानालाई वित्तिय तथा सहकारी संस्था समन्वय विभाग, अजयकुमार चौरासियालाई तराई मधेस समन्वय विभाग, महेन्द्र यादवलाई यातायात व्यवसायी समन्वय विभाग र शंकर भण्डारीलाई तरुण विभागको जिम्मेवारी दिएका छन्। साथै, सीता गुरुङलाई आदिवासी जनजाति विभाग, गोविन्द भट्टराईलाई नेपाली जनसम्पर्क समिति समन्वय विभाग, चिनकाजी श्रेष्ठलाई उद्योग व्यापार विभाग र प्रवक्ता विश्वप्रकाश शर्मालाई सूचना, सञ्चार तथा प्रसार विभाग र शिवप्रसाद हुमागाईंलाई श्रमिक तथा ट्रेड युनियन विभागको संयोजकको जिम्मेवारी दिएका छन्।

देउवाले शुक्रबार वरिष्ठ नेता रामचन्द्र पौडेललाई टेलिफोन गरी आफूले विभाग गठन गर्न लागेकाले नाम पठाउन आग्रह गरेका थिए । प्रतिउत्तरमा पौडेल यति ढियो विभाग गठनको औचित्य छैन भन्दै महाधिवेशनको तयारी गर्न देउवालाई सल्लाह दिएका थिए । तर देउवाले अटेर गर्दै विभागहरु गठन गरेका थिए । पूर्वसचिव शारदाप्रसाद त्रितालले नेकपामा वामदेव गौतमलाई साँसद बनाउने खेल र काँग्रेसमा महाधिवेशनको घोषणा पछि विभाग गठन गर्ने कुरा एकै भएको प्रतिक्रिया जनाएका छन् ।