१६ फाल्गुन २०७७, आईतवार

साग स्वर्ण पदक विजेतालाई एन्फाले जनही ५ लाख दिने

आर्थिक सञ्जाल
२६ माघ २०७६, आईतवार १६:२०

काठमाडौं, माघ २६ घरेलु मैदानमा भएको १३ औं दक्षिण एसियाली खेलकुद (साग) को स्वर्ण पदक विजेता यू २३ फुटबल टोलीलाई अखिल नेपाल फुटबल संघ (एन्फा) ले जनही ५ लाख ५० हजार रुपैयाँ दिने भएको छ ।
एन्फाको नौ महिनापछि आइतबार बसेको बैठकले सागको रजत पदक विजेता महिला टोलीका सदस्यलाई भने जनही १ लाख ५० हजार रुपैयाँ दिने निर्णय गरेको छ ।
गत मंसिर १५ देखि २४ गते सम्म आयोजना भएको १३ औं सागमा नेपालले भुटानलाई हराउँदै स्वर्ण पदक जितेको थियो । महिलातर्फ भने नेपाली टोली भारतसँग पराजित भएको थियो । सरकारले भने स्वर्ण पदक जित्ने फुटबल टोलीका सदस्यलाई जनही ५ लाख रुपैयाँ दिने यस अघि नै घोषणा गरिसकेको छ ।
एन्फाले सहिद स्मारक बी र सी डिभजिन लिगको लागि तयारी र पुरस्कार राशीको पनि तय गरेको छ । बी डिभिजन टोलीलाई लिगको तयारीका लागि हरेक क्लबलाई १० लाख रुपैयाँ दिने निर्णय एन्फाले गरेको छ । बी डिभिजनको विजेतालाई १५ लाख, दोस्रोलाई ८, तेस्रोलाई ५ तथा चौथोलाई ३ लाख रुपैयाँ दिने निर्णय गरेको अखिल नेपाल फुटबल संघ (एन्फा) ले छ ।